9 лютага ў рамках XXIV Мінскага міжнароднага кніжнага кірмашу адбыўся круглы стол “Беларусь – Брытанія. Магчымасці для выдавецкага бізнесу”.
Арганізатарам круглага стала выступіла пасольства Вялікабрытаніі – краіны, якая з'яўляецца ганаровым госцем форуму. З прывітальным словам да ўдзельнікаў звярнуліся пасол Яе Вялікасці спадарыня Фіёна Гіб і першы намеснік міністра інфармацыі Рэспублікі Беларусь Ігар Луцкі.
Удзельнікамі круглага стала “Беларусь – Брытанія. Магчымасці для выдавецкага бізнесу” сталі прадстаўнікі Асацыяцыі выдаўцоў Вялікабрытаніі, прадстаўнікі Міністэрства адукацыі Рэспублікі Беларусь, Мытнага камітэта, а таксама вядучыя супрацоўнікі і кіраўнікі дзяржаўных і прыватных выдавецтваў, кнігарань нашай краіны, спецыялісты Нацыянальнай кніжнай палаты і Нацыянальнай бібліятэкі Беларусі.
Абмяркоўваліся перспектывы і складанасці доўгачасовага і ўзаемавыгаднага супрацоўніцтва, пытанні перакладу на беларускую і рускую мовы англамоўнай літаратуры, яе распаўсюджванне на тэрыторыі нашай рэспублікі, а таксама папулярызацыя прадукцыі беларускіх і брытанскіх выдавецтваў у агульнаеўрапейскай прасторы.
Прадстаўнікі Нацыянальнай бібліятэкі Беларусі – намеснік дырэктара па інфармацыйных рэсурсах Таццяна Кузьмініч і галоўны бібліятэкар аддзела карпаратыўнага ўзаемадзеяння Надзея Радзюк – выступілі з дакладам і прэзентацыяй пра электронныя інфармацыйныя рэсурсы вядучых брытанскіх выдавецтваў у падпісным рэпертуары Нацыянальнай бібліятэкі Беларусі і магчымасці іх распаўсюджвання ў іншых айчынных бібліятэках і інфармацыйных цэнтрах.