Беларусь і ААН: гісторыя і сучаснасць

22 кастрычніка ў мабільнай галерэі Нацыянальнай бібліятэкі Беларусі адбылося ўрачыстае адкрыццё культурна-асветніцкага праекта “Беларусь і ААН: гісторыя і сучаснасць”.

Праект арганізаваны Прадстаўніцтвам ААН у Рэспубліцы Беларусь сумесна з Нацыянальнай бібліятэкай Беларусі да Дня Арганізацыі Аб’яднаных Нацый (24 кастрычніка) і складаецца з фота- і кніжнай выстаўкі “ААН для міру і дабрабыту народаў”.

У дакументах, экспануемых на кніжнай выстаўцы, раскрываецца шматгранная дзейнасць ААН ва ўсім свеце, а ў асобным раздзеле прадстаўлена літаратура, якая асвятляе розныя аспекты супрацоўніцтва Беларусі з гэтай міжнароднай арганізацыяй. Трэба адзначыць, што Нацыянальная бібліятэка Беларусі мае статус дэпазітарыя ААН ужо больш за паўстагоддзя. Экспазіцыя змяшчае звыш 100 дакументаў з фондаў Нацыянальнай бібліятэкі Беларусі на рускай і англійскай мовах: кнігі, перыядычныя выданні, мімеаграфаваныя матэрыялы ААН, брашуры, буклеты.

Як адзначыла пад час адкрыцця выстаўкі першы намеснiк дырэктара Нацыянальнай бібліятэкі Беларусі па абслугоўванні карыстальнікаў і ідэалогіі Алена Далгаполава, у бібліятэцы змешчана больш за 200 тысяч дакументаў, што датычацца дзейнасці ААН. Гэтыя дакументы, па яе словах, маюць пастаянную аўдыторыю, якая раней абслугоўвалася толькі друкаванымі дакументамі, але з 2004 года выданні сталі даступнымі і ў электронным фармаце, што дазволіла больш аператыўна забяспечваць чытачоў неабходнай інфармацыяй.

Другая частка праекта – фотаэкспазіцыя – прысвечана гісторыі ААН і той ролі, якую выконвала Беларусь пры яе стварэнні, адлюстроўвае дзейнасць арганізацый сістэмы ААН у рамках рэалізацыі “Мэтаў развіцця тысячагоддзя”. Кожны фотаздымак – гэта асобная гісторыя рэалізацыі гуманітарных і міратворчых праектаў у розных краінах свету.

“ААН – гэта не толькі мужчыны ў шыкоўных касцюмах і гальштуках, ААН – гэта ўсе тыя людзі, якіх мы бачым на фотаздымках, усе, хто вакол нас”, – адзначыў на ўрачыстасці прадстаўнік ААН у Беларусі Санака Самарасінха. Ён таксама падкрэсліў, што Беларусь працягвае адыгрываць актыўную ролю ў дзейнасці ААН, у сувязі з чым падзякаваў Нацыянальнай бібліятэцы Беларусі за тое, што яе супрацоўнікі беражліва захоўваюць дакументы, якія могуць у перспектыве дапамагчы моладзі пабудаваць лепшы свет.

Абедзве выстаўкі будуць працаваць да 7 лістапада: фатаграфічная – у мабільнай галерэі (3-ці паверх), кніжная – у аддзеле абслугоўвання афіцыйнымі дакументамі (2-гі паверх, пам. 207).