З 26 па 27 чэрвеня Нацыянальная бібліятэка Беларусі прымала ўдзельнікаў міжнароднай стажыроўкі “Міжкультурны і прафесійны дыялог маладых спецыялістаў бібліятэк краін СНД”.
У мерапрыемстве ўдзельнічалі прадстаўнікі бібліятэк Азербайджана, Арменіі, Беларусі, Казахстана, Кыргызстана, Малдовы, Расіі, Таджыкістана і Узбекістана. Стажыроўка арганізавана Бібліятэчнай асамблеяй Еўразіі пры падтрымцы Міждзяржаўнага фонду гуманітарнага супрацоўніцтва дзяржаў – удзельніц СНД.
Вучоба адбылася на базе дзвюх найбуйнешых бібліятэк Садружнасці. Першы этап вучобы прайшоў у Расійскай дзяржаўнай бібліятэцы з 21 па 23 чэрвеня 2017 года, другі – у Нацыянальнай бібліятэцы Беларусі з 26 па 27 чэрвеня. Мінская праграмабыла насычанай і карыснай для маладых спецыялістаў: іх чакалі лекцыі, трэнінгі, дыскусіі, пазнавальныя экскурсіі і абмен вопытам.
26 чэрвеня адбылася сустрэча з першым намеснікам дырэктара Нацыянальнай бібліятэкі Беларусі Аленай Далгаполавай, якая пазнаёміла гасцей з гісторыяй і рэсурсамі ўстановы, яе магчымасцямі як інфармацыйнага і сацыякультурнага цэнтра краіны.
Для маладых калег прайшла азнаямляльная экскурсія, падчас якой яны змаглі ацаніць архітэктуру і афармленне “беларускага дыямента”, азнаёміліся з дзейнасцю бібліятэкі. У музеі кнігі гасцям была прачытана лекцыя, прысвечаная 500-годдзю беларускага і ўсходнеславянскага кнігадрукавання.