15 сакавіка ў бібліятэцы прайшла ўрачыстая цырымонія ўручэння пашпартоў і членскіх білетаў БРСМ навучэнцам Першамайскага раёна г. Мінска.
Традыцыйна мерапрыемства было прымеркавана да Дня Канстытуцыі Рэспублікі Беларусь і адбылося ў рамках Усебеларускай патрыятычнай акцыі “Мы – грамадзяне Беларусі!”.
Урачыстасць, афіцыйнасць і лёгкае хваляванне – не кожны дзень уручаюць такія важныя дакументы, як пашпарт! Бо пашпарт – гэта твар грамадзяніна, увасабленне гонару за сваю краіну, яе культуру і каштоўнасці. Удзельнікі цырымоніі ў юным узросце ў поўнай меры ўсведамляюць, што атрыманне білета ў дарослае жыццё гранічыць не толькі з пэўнай свабодай, але таксама і з вялікай адказнасцю. Сёння дзеці з’яўляюцца пераможцамі шматлікіх рэспубліканскіх і міжнародных конкурсаў, алімпіяд і спаборніцтваў, а ў будучым таленавітая моладзь гатова з энтузіязмам працаваць для шчаслівага і мірнага жыцця сваёй краіны.
Галоўны дакумент навучэнцам Першамайскага раёна ўручылі ганаровыя госці цырымоніі: кіраўнік адміністрацыі Першамайскага раёна г. Мінска Ігар Кудрэвіч, старшыня Мінскага гарадскога Савета дэпутатаў 27-га склікання Васіль Панасюк, дэпутаты Палаты прадстаўнікоў Нацыянальнага сходу Рэспублікі Беларусь Сяргей Бобрыкаў і Максім Місько.
Словы віншавання ў адрас дзяцей прагучалі ад намесніка кіраўніка адміністрацыі Першамайскага раёна г. Мінска Алены Асадчай, першага сакратара БРСМ Першамайскага раёна Алены Лісай, дэпутатаў Мінскага гарадскога Савета дэпутатаў 27-га склікання Арцёма Вілюхі і Уладзіміра Краўчонка. Госці ўручылі самым актыўным і таленавітым членскія білеты БРСМ, пажадаўшы поспехаў і новых дасягненняў у тых занятках і хобі, якія дзеці для сябе абралі.
Пасля ўрачыстай часткі мерапрыемства для моладзі прайшла аглядная экскурсія па будынку Нацыянальнай бібліятэкі Беларусі. Для дасягнення пастаўленых мэт і атрымання прафесійных ведаў сюды яны вернуцца яшчэ не раз. А мы заўсёды будзем рады ў гэтым дапамагчы! Так што, сардэчна запрашаем, моладзь!