13 снежня ў Нацыянальнай бібліятэцы Беларусі прайшло падвядзенне вынікаў года ў прафесійным асяроддзі выдаўцоў, паліграфістаў і распаўсюджвальнікаў.
Арганізатары – Міністэрства інфармацыі Рэспублікі Беларусь, Нацыянальная бібліятэка Беларусі, Нацыянальная кніжная палата Беларусі.
Мерапрыемства пачалося з адкрыцця выстаўкі “Кнігі Беларусі. Год 2019”. Упершыню ў Нацыянальнай бібліятэцы прадстаўлена ўся палітра беларускага кнігавыдання за 2019 год. У Беларусі выдавецкай дзейнасцю займаюцца больш за 500 суб’ектаў гаспадарання, дзякуючы якім cёлета выдадзена больш за 9 000 кніг агульным накладам больш за 20 мільёнаў асобнікаў.
Самай папулярнай кнігай 2019 года стала “Каласы пад сярпом тваім” Уладзіміра Караткевіча. З гэтымі і іншымі выданнямі можна азнаёміцца ў выставачным комплексе (пам. 104).
Цырымонія ўзнагароджання калектываў і супрацоўнікаў галіны, а таксама партнёраў кнігавыдавецкай сферы па выніках года сімвалічна прайшла ў сценах “алмаза ведаў”. Адзначыць лепшых выйшлі на сцэну намеснік міністра інфармацыі Ігар Бузоўскі і дырэктар Нацыянальнай бібліятэкі Беларусі Раман Матульскі.
У рамках навагодняй дабрачыннай акцыі “Нашы дзеці” арганізатары мерапрыемства і айчынныя выдавецтвы падрыхтавалі падарунак для выхаванцаў Бялыніцкай школы-інтэрната для дзяцей-сірот і дзяцей, якія засталіся без бацькоўскай апекі – лепшыя беларускія дзіцячыя кнігі 2019 года.
Прыемным сюрпрызам для гасцей стаў спектакль “Пясняр”, прысвечаны народнаму артысту СССР Уладзіміру Мулявіну, у выкананні акцёраў Беларускага акадэмічнага драматычнага тэатра імя М. Горкага.
Матэрыял прадастаўлены аддзелам сувязей з грамадскасцю.
Глядзіце і чытайце таксама пра падзею ў тэлесюжэтах, публікацыях СМІ і нашым фотарэпартажы:
- У Нацыянальнай бібліятэцы стартуе праект "Кнігі Беларусі. Год 2019": якія мерапрыемствы запланаваны (СТБ)
- У Беларусі кніга Уладзіміра Караткевіча "Каласы пад сярпом тваім" прызнана самай папулярнай у 2019 годзе (БелТА)
- Стартаваў праект "Кнігі Беларусі. Год 2019" ("Звязда")
- У Нацыянальнай бібліятэцы падвялі кніжныя вынікі года маштабнай выставай (СБ – Беларусь сегодня)
- Прачытанае застаецца. У памяці ("Рэспубліка")