25 лістапада ў бібліятэцы адбылася экскурсія “Славутыя імёны Бацькаўшчыны” па творчасці Марка Шагала для ўдзельнікаў праекта “Час маляваць” з горада Санкт-Пецярбурга.
“Час маляваць” – гэта супольнасць мастакоў, ілюстратараў і тых, хто вучыцца маляваць. Яго ўдзельнікі малююць, вучаць маляваць іншых і разам падарожнічаюць. У рамках скетч-тура ў сталіцу Беларусі каманда “Час маляваць” пабывала і ў нашым “алмазе ведаў”.
Госці пазнаёміліся з архітэктурай бібліятэчнага будынка, яго мастацкім афармленнем, падняліся на аглядную пляцоўку, пабывалі ў музеі кнігі і, вядома, выканалі некалькі замалёвак – прадставілі інтэр’еры бібліятэкі ў сваіх нататніках і альбомах.
У адным з чытальных залаў для гасцей была арганізавана кніжная выстаўка і прэзентацыя па творчасці Марка Шагала. Экскурсанты змаглі пагартаць альбомы з творамі вядомага мастака, на некаторы час паглыбіцца ў гісторыю жыцця майстра і таямнічы, але светлы свет яго карцін. І, безумоўна, памаляваць.
Мы былі вельмі радыя сустрэчы і спадзяёмся ўбачыць удзельнікаў праекта зноў.
Матэрыял падрыхтаваны аддзелам экскурсійна-метадычнай работы.
