31 студзеня адбудзецца ўрачыстае адкрыццё кніжнай выстаўкі “Пад крыламі дракона”, прымеркаванай да 25-годдзя ўстанаўлення дыпламатычных адносін паміж Рэспублікай Беларусь і Кітайскай Народнай Рэспублікай.
У рамках мерапрыемства пройдзе прэзентацыя кнігі “Белорусско-китайские отношения в воспоминаниях белорусских послов”, аўтарам якой з'яўляецца дырэктар Рэспубліканскага інстытута кітаязнаўства імя Канфуцыя БДУ, Надзвычайны і Паўнамоцны Пасол Рэспублікі Беларусь у КНР з 2006 па 2010 год Анатоль Тозік.
Экспазіцыя выстаўкі будзе ўключаць 300 выданняў на беларускай, рускай, кітайскай і англійскай мовах па гісторыі, культуры, архітэктуры, навуковых і эканамічных дасягненнях Кітая. У цэнтры экспазіцыі – раздзел, прысвечаны беларуска-кітайскім адносінам.
Шырокае кола чытачоў зможа пазнаёміцца з займальнымі і арыгінальнымі выданнямі, якія даступна і цікава распавядуць пра Кітай. Беларускім вучоным, выкладчыкам і студэнтам будуць карысныя зборнікі прац, манаграфіі і вучэбная літаратура.
Мерапрыемства пачнецца а 16-й гадзіне ў галерэі “Лабірынт” (3-ці паверх).
Наведаць выстаўку можна да 1 сакавіка на выставачнай пляцоўцы 3-га паверха.
Тэлефоны для даведак: (8 017) 293 27 56, 293 79 80.
E-mail: pr@nlb.by