29 кастрычніка ў Нацыянальнай бібліятэцы Беларусі адбылося ўрачыстае мерапрыемства з нагоды 150-годдзя Міжнароднага руху Чырвонага Крыжа і Чырвонага Паўмесяца.
Мерапрыемствы, прымеркаваныя да святкавання юбілейнай даты, былі арганізаваны на працягу ўсяго года Беларускім таварыствам Чырвонага Крыжа.
У рамках святкавання ў Нацыянальнай бібліятэцы прайшла прэзентацыя дзейнасці Чырвонага Крыжа і адкрыццё фотавыстаўкі Беларускага таварыства Чырвонага Крыжа. 40 фатаграфій з архіва Міжнароднага камітэта Чырвонага Крыжа (МКЧК), якія ўваходзяць у экспазіцыю, – гэта своеасаблівая хроніка МКЧК, усяго Міжнароднага руху Чырвонага Крыжа і Чырвонага Паўмесяца і развіцця міжнароднага гуманітарнага права, пачынаючы з выявы першай старонкі першай Жэнеўскай канвенцыі і заканчваючы нядаўнімі кадрамі з Сірыі. Фатаграфіі зроблены як майстрамі з сусветным імем, так і радавымі супрацоўнікамі МКЧК, якія аказаліся сведкамі драматычных і трагічных сітуацый у самых розных кутках планеты.
“Фатаграфіі расказваюць пра падзеі гісторыі на працягу звыш 100 гадоў. Асноўны пасыл выстаўкі – раскрыць значнасць гуманітарнай дзейнасці, бо вайна заўсёды прыносіць пакуты, але іх можна палегчыць, і гэта галоўная задача Міжнароднага камітэта Чырвонага Крыжа”, – адзначыў пад час адкрыцця выстаўкі кіраўнік Дэлегацыі МКЧК у Расійскай Федэрацыі, Рэспубліцы Беларусь, Малдове і Украіне Паскаль Кюта.
Прадстаўнікі Беларускага і Міжнароднага Чырвонага Крыжа ўзнагародзілі лепшых валанцёраў Беларусі граматамі Міжнароднага камітэта Чырвонага Крыжа, а трох пераможцаў конкурсу апавяданняў “Гуманнасць у сэрцы кожнага” – каштоўнымі падарункамі.
 |
 |
 |
 |
