Да юбілею пісьменніка адкрылася выстаўка “Каўчэг Чынгіза Айтматава”

12 снежня ў бібліятэцы да 90-гадовага юбілею кіргізскага і рускага пісьменніка адкрылася кніжна-ілюстрацыйная выстаўка “Каўчэг Чынгіза Айтматава”.

Арганізатарамі мерапрыемства сталі Нацыянальная бібліятэка Беларусі сумесна з Пасольствам Кыргызскай Рэспублікі ў Рэспубліцы Беларусь.

На ўрачыстым адкрыцці экспазіцыі Надзвычайны і Паўнамоцны Пасол Кыргызскай Рэспублікі ў Рэспубліцы Беларусь Кубанычбек Амураліеў адзначыў, што кнігі таленавітага пісьменніка перакладзены на 176 моў і ўваходзяць у дзясятку самых шматтыражных – у агульнай складанасці выйшла 100 мільёнаў экзэмпляраў.

– Кыргызскі народ унёс вялікі ўклад у сусветную літаратуру – гэта найбуйнейшы эпас "Манас" і кнігі Чынгіза Айтматава, – дадаў пасол і перадаў у дар Нацыянальнай бібліятэцы 10-томны збор твораў пісьменніка.

Дырэктар Нацыянальнай бібліятэкі Беларусі Раман Матульскі выказаў словы падзякі высокаму госцю за супрацоўніцтва і каштоўны падарунак.

– Айтматаў пісаў пра тое, што захоўвалася ў душы кожнага чалавека. Час ідзе, а пачуцці людзей не змяняюцца. Нязменная і папулярнасць Айтматава, – так Раман Сцяпанавіч патлумачыў сусветную вядомасць і прызнанне пісьменніка.

У адкрыцці выстаўкі таксама прынялі ўдзел пісьменніца і паэтэса, член Саюза пісьменнікаў Беларусі Наталля Батракова і старшы выкладчык кафедры рускай літаратуры Беларускага дзяржаўнага ўніверсітэта Аляксандр Гарбачоў. Сярод гасцей таксама прысутнічалі дыпламаты, дзеячы культуры і прадстаўнікі творчай інтэлігенцыі.

На цырымоніі адкрыцця госці азнаёміліся з фотавыстаўкай “Айтматаў – дыпламат”, падрыхтаванай Пасольствам Кыргызскай Рэспублікі ў Рэспубліцы Беларусь. Прадстаўленая на стэндах падборка здымкаў, дакументаў, тэлеграм, выразак з газет і фрагментаў з аўтабіяграфіі – сведчанне актыўнай дыпламатычнай дзейнасці пісьменніка.

На выстаўцы “Каўчэг Чынгіза Айтматава” прадстаўлены як творы пісьменніка, так і літаратура пра яго жыццё і творчасць з калекцыі Нацыянальнай бібліятэкі Беларусі, ілюстрацыйны матэрыял, кнігі, якімі папоўніла фонд нашага “алмаза ведаў” Нацыянальная бібліятэка Рэспублікі Кыргызстан. Сярод іх энцыклапедыя “Вселеннная Айтматова”, зборнік твораў “Белый дождь” і чатыры часткі відэапераказу эпасу “Манас”.

Пабываць на “Каўчэгу Чынгіза Айтматава” можна да 10 студзеня 2019 г.
Выстаўка размешчана на кальцавым калідоры 3-га паверха.
Дата завяршэння яе работы можа быць зменена.

Час работы выстаўкі адпавядае рэжыму работы бібліятэкі.
Уваход – па чытацкім білеце ці білеце сацыякультурнага цэнтра.