Падборкі публікацый органаў сістэмы ААН прапануе віртуальны цэнтр па дзейнасці міжнародных арганізацый на сайце Нацыянальнай бібліятэкі Беларусі.
Віртуальны цэнтр па дзейнасці міжнародных арганізацый папоўніўся новымі матэрыяламі – абноўлены раздзел “Дакументы ААН у фондах Нацыянальнай бібліятэкі Беларусі” дапаможа ў пошуку ключавых публікацый Арганізацыі Аб’яднаных Нацый, якія захоўваюцца ў бібліятэцы.
Інфармацыя аб наяўных выданнях суправаджаецца гіперспасылкамі на старонкі электроннага каталога бібліятэкі, дзе можна паглядзець поўнае апісанне абранага дакумента, даведацца яго месцазнаходжанне і аформіць заказ дакумента.
Прадстаўлена інфармацыя аб дакументах шасці галоўных органаў ААН: Генеральнай асамблеі, Савета Бяспекі, Эканамічнага і сацыяльнага савета, Міжнароднага суда, Савета па апецы, Сакратарыята, а таксама яе спецыялізаваных устаноў: Сусветнага банка, Сусветнай арганізацыі аховы здароўя, Міжнароднага агенцтва па атамнай энергіі, Міжнароднага валютнага фонду, Міжнароднай арганізацыі працы, Арганізацыі Аб’яднаных Нацый па пытаннях адукацыі, навукі і культуры.
Для кожнай з гэтых арганізацый прыводзіцца пералік яе найбольш важных публікацый, якія ёсць у Нацыянальнай бібліятэцы Беларусі, у ліку якіх:
- афіцыйныя справаздачы (рэзалюцыі, рашэнні, пастановы, справаздачы аб пасяджэннях, гадавыя даклады аб дзейнасці)
- агляды і даклады па пытаннях сусветнага развіцця, якія публікуюцца на рэгулярнай аснове
- перыядычныя выданні і выданні з працягам
- даведачныя выданні.
Прыведзена інфармацыя аб дакументах, апублікаваных з 1950–1960-х гг. і да цяперашняга часу.
Матэрыял пададзены аддзелам абслугоўвання афіцыйнымі дакументамі.