15 снежня а 16-й гадзіне ў канферэнц-зале адбудзецца ўрачыстая цырымонія перадачы Выдавецтвам Беларускага экзархата факсімільнага выдання Слуцкага Евангелля ў дар Нацыянальнай бібліятэцы Беларусі і бібліятэкам краіны.
Арганізатары мерапрыемства, якое адбываецца ў рамках праекта “Вяртанне святынь”, – Міністэрства культуры Рэспублікі Беларусь, Беларуская праваслаўная царква, Нацыянальная бібліятэка Беларусі.
У 2009 г. Выдавецтва Беларускага экзархата падрыхтавала і выпусціла факсімільнае выданне Слуцкага Евангелля, якое з’яўляецца практычна дакладнай копіяй рукапіснага помніка. Па ўзроўні выканання выданне не мае аналагаў у Беларусі. За выданне Слуцкага Евангелля і духоўна-асветніцкую дзейнасць Выдавецтва Беларускага экзархата ўдастоена прэміі “За духоўнае адраджэнне” прэзідэнта Рэспублікі Беларусь, а таксама вышэйшых узнагарод у галіне кнігавыдавецтва Нацыянальнага конкурсу “Мастацтва кнігі – 2010” і Міжнароднага конкурсу “Мастацтва кнігі – 2010” краін – удзельніц СНД у Маскве.
Падчас урачыстага мерапрыемства член выдавецкага савета Рускай праваслаўнай царквы, выканаўчы дырэктар Выдавецтва Беларускага экзархата Уладзімір Грозаў перадасць дырэктару Нацыянальнай бібліятэкі Беларусі Раману Матульскаму факсімільнае выданне Слуцкага Евангелля, якое зойме годнае месца ў фондах бібліятэкі. Уладальнікамі каштоўнага выдання стануць і іншыя бібліятэкі краіны.
У ходзе мерапрыемства будзе дэманстравацца фільм пра рэспубліканскую духоўна-асветніцкую праграму “Сям’я – Яднанне – Айчына”. Гасцей чакае музычна-тэатралізаванае прадстаўленне-дэманстрацыя Слуцкага Евангелля ў выкананні камернага духоўнага тэатра Цэнтра праваслаўнай культуры “Спадарожнік Хрысціяніна” і выступленне вядомага вакальнага мужчынскага ансамбля “Благовест” Выдавецтва Беларускага экзархата.
Уваход на мерапрыемства – правы бакавы, з боку рэстарана “Мегаполіс".
Тэлефон для даведак: 293-27-67.
Е-mail: pr@nlb.by
