14 кастрычніка – дзень, калі з асаблівым трапятаннем і пяшчотай мы гаворым шчырыя цёплыя словы тым, хто падарыў нам жыццё, – нашым мамам.
У гэты сонечны восеньскі дзень мы традыцыйна запрашаем на тэматычную экскурсію самых родных і блізкіх людзей, каб падарыць ім добры настрой і адцягнуць ад паўсядзённай мітусні.
Сёння бібліятэку наведа група педагогаў ДУА “Сярэдняя школа № 1 г. Лагойска”, шматдзетных маці ўстановы і педагогаў-ветэранаў, а таксама падшэфных аддзялення дзённага знаходжання пажылых грамадзян “ТЦСАН Лагойскага раёна”.
Падчас экскурсіі, прысвечанай Дню маці, жанчыны пазнаёміліся з будынкам галоўнай “захавальніцы ведаў”, пачулі гісторыі жыцця знакамітых беларусак, вобразы якіх адлюстраваны ў мастацкім афармленні будынка, наведалі выставу “Сімвалы жыцця” і прэзентацыю, якая шырока раскрыла тэму свята.
Напрыканцы прыгажунь-наведвальніц чакаў не адзін сюрпрыз: унікальная выстава бальных касцюмаў і аксесуараў “Бляск убораў і таямніцы флірту”, памятныя паштоўкі з добрымі пажаданнямі і пад’ём на аглядную пляцоўку бібліятэкі.
Запрашаем і вас у Нацыянальную бібліятэку Беларусі на экскурсіі, прысвечаныя нашым славутым землякам і значным падзеям айчыннай гісторыі. Азнаёміцца са спісам экскурсій цыкла “Славутыя імёны Бацькаўшчыны” можна на нашым сайце, атрымаць дадатковую інфармацыю – па тэлефонах: (8 017) 293 29 66, 293 28 53.
Матэрыял пададзены экскурсійна-метадычным аддзелам.