16 верасня, напярэдадні Дня народнага адзінства, на экскурсію ў Нацыянальную бібліятэку завіталі навучэнцы Мінскага дзяржаўнага каледжу тэхнікі і тэхналогій будаўніцтва.
Для іх была праведзена экскурсія з цыкла “Славутыя імёны Бацькаўшчыны” на тэму “Помнім боль і страты твае, Беларусь…” (па творчасці перыяду Вялікай Айчыннай вайны А. Куляшова, М. Танка, П. Панчанкі).
Спадчына кожнага з абраных экскурсантамі вядомых беларусаў – у спісе найбольш значных дасягненняў нацыянальнай кніжнай культуры. Знаёмства з біяграфіяй славутых землякоў дапамагае адчуць гонар за сваю радзіму і ўсвядоміць адметнасць беларусаў сярод народаў свету.
У межах экскурсіі навучэнцы пазнаёміліся з асноўнымі падзеямі з жыцця творцаў, унікальнымі дакументамі з фондаў Нацыянальнай бібліятэкі, у тым ліку ўбачылі выяўленчыя дакументы, звязаныя з тэмай Вялікай Айчыннай вайны: фотаздымкі, паштоўкі, плакаты, баявыя лісткі, рэпрадукцыі карцін, факсімільныя выданні франтавых газет.
Запрашаем і вас на экскурсіі, прысвечаныя нашым славутым землякам і значным падзеям айчыннай гісторыі. Азнаёміцца са спісам экскурсій цыкла “Славутыя імёны Бацькаўшчыны” можна тут, атрымаць дадатковую інфармацыю – па тэлефонах: (8 017) 293 29 66, 293 28 53.
Матэрыял пададзены аддзелам экскурсійна-метадычнай работы.
