21 жніўня ў бібліятэцы адбылася канферэнцыя педагагічных работнікаў Мінскага раёна “Кіраванне развіццём: канструктыўнае асяроддзе i адукацыйныя вынікі”, арганізаваная аддзелам адукацыі, спорту і турызму Мінскага раённага выканаўчага камітэта.
У рабоце канферэнцыі прынялі ўдзел прадстаўнікі Мінскага раённага выканаўчага камітэта, галоўнага ўпраўлення па адукацыі Мінскага абласнога выканаўчага камітэта, Мінскага раённага камітэта прафесійнага саюза работнікаў адукацыі і навукі, педагагічныя калектывы адукацыйных устаноў раёна.
Для ўдзельнікаў мерапрыемства была праведзена вучэбна-пазнавальная экскурсія “Славутыя імёны Бацькаўшчыны”, прысвечаная жыццю і творчасці класікаў беларускай літаратуры і мастацтва. Увазе гасцей была прадстаўлена кніжная выстаўка, на якой яны змаглі пазнаёміцца з арыгіналамі прыжыццёвых выданняў нашых вядомых землякоў з фондаў Нацыянальнай бібліятэкі Беларусі. Акрамя таго, экскурсанты прынялі ўдзел у літаратурнай віктарыне: з дапамогай электронных планшэтаў адказалі на пытанні па паэме Якуба Коласа “Новая зямля” і прыгодніцкай аповесці Янкі Маўра “Палескія рабінзоны”.
Вучэбна-пазнавальныя экскурсіі “Славутыя імёны Бацькаўшчыны” разлічаны перш за ўсё на навучэнцаў і педагогаў устаноў агульнай сярэдняй адукацыі і ўстаноў сярэдняй спецыяльнай адукацыі. Пры іх распрацоўцы выкарыстоўваюцца інфармацыйныя рэсурсы Нацыянальнай бібліятэкі Беларусі, улічваюцца вучэбныя праграмы па прадметах “Беларуская лiтаратура”, “Мастацтва (айчынная і сусветная мастацкая культура)” і юбілейныя даты. Гэта дае магчымасць наведваць бібліятэку на працягу некалькіх гадоў і кожны раз знаёміцца з жыццём і творчасцю новых яркіх прадстаўнікоў беларускай літаратуры і культуры. На сённяшні дзень распрацаваны экскурсіі, прысвечаныя жыццёваму і творчаму шляху Якуба Коласа, Янкі Купалы, Максіма Багдановіча, Янкі Маўра, Кандрата Крапівы, Міхася Зарэцкага, Францыска Скарыны і Марка Шагала.
Таксама для ўдзельнікаў канферэнцыі была праведзена экскурсія “Ажыўшыя кнігі”, якая разлічана на наведванне бібліятэкі ўсёй сям’ёй. Выкарыстоўваючы электронныя планшэты, госці змаглі “ажывіць” ілюстрацыі ў кнігах з дапоўненай рэальнасцю.
Экскурсійная дзейнасць Нацыянальнай бібліятэкі Беларусі пастаянна развіваецца і дапаўняецца новымі праектамі. Супрацоўнікі бібліятэкі заўсёды рады прадставіць іх наведвальнікам і заклікаюць да супрацоўніцтва педагогаў, вучняў і іх бацькоў.
Запрашаем усіх жадаючых прыняць удзел у экскурсіях з цыклу “Славутыя імёны Бацькаўшчыны”, прысвечаных творчасці беларускіх класікаў літаратуры і мастацтва, а таксама на інтэрактыўную экскурсію “Ажыўшыя кнігі”.
