21 лютага ў бібліятэцы прайшла першая рабочая экскурсія “Мінск на далоні”, якая ў хуткім часе будзе весціся на “яснай мове”.
Экскурсію наведалі маладыя людзі з сацыяльна-працоўнай майстэрні “Цёплы дом”, супрацоўнікі грамадскага аб'яднання “Беларуская асацыяцыя дапамогі дзецям-інвалідам і маладым інвалідам” (ГА “БелАДДІіМІ”), выкладчыкі і студэнты Інстытута інклюзіўнай адукацыі.
Міні-праект “Пераклад экскурсіі «Мінск на далоні» на «ясную мову»”ажыццяўляецца Нацыянальнай бібліятэкай Беларусі сумесна з ГА “БелАДДІіМІ” і накіраваны на стварэнне безбар'ернага камунікацыйнага асяроддзя.
У 2016 годзе Рэспубліка Беларусь ратыфікавала Канвенцыю аб правах інвалідаў, у 2017 годзе быў зацверджаны Нацыянальны план дзеянняў па рэалізацыі палажэнняў Канвенцыі аб правах інвалідаў на 2017–2025 гады. Згодна з гэтымі дакументамі, неабходна распрацаваць і ўкараніць “ясную мову” як форму адлюстравання пісьмовай, вуснай і іншай інфармацыі, даступнай для людзей, якім цяжка ўспрымаць і разумець (асобы з асаблівасцямі псіха-фізічнага развіцця, дзеці, пажылыя, замежнікі і іншыя).
З паняццем “ясная мова” ўжо знаёмы ў многіх краінах свету. Яна дае магчымасць людзям з цяжкасцямі ў разуменні і чытані тэкстаў знаёміцца з рознымі дакументамі, атрымліваць інфармацыю і прымаць рашэнні ў многіх сферах жыцця самастойна, без чыёй-небудзь падказкі і дапамогі.
Рэалізацыя міні-праекта “Пераклад экскурсіі «Мінск на далоні» на «ясную мову»” створыць у Нацыянальнай бібліятэцы Беларусі спрыяльныя ўмовы па далучэнні людзей з інваліднасцю да культурнага жыцця.
