Да Міжнароднага дня музеяў, які адзначаецца 18 мая, музей кнігі зладзіў творчы эксперымент, падчас якога юныя мастакі атрымалі магчымасць стаць сапраўднымі музейнымі куратарамі і дызайнерамі.
Музейнікам можа стаць кожны?! Дзецям было прапанавана самастойна стварыць экспазіцыю ў музеі кнігі. Увесь працэс ад нараджэння ідэі выставы (канцэпцыі), адбору матэрыялу, этыкетажу (надпісаў) да мантажу і дызайну афішы быў выкананы юнымі мастакамі. Экспанатамі сталі экслібрысы (кніжныя знакі), створаныя ўдзельнікамі творчай майстэрні “Залаты птах” пад кіраўніцтвам Юліі Шаціла. Мастацкія творы зроблены ў тэхніцы лінагравюры і прадстаўлены на выставе разам з арыгінальнымі клішэ на лінолеуме.
Назву для выставы – “Гісторыі пішуць экслібрысы” – прыдумалі самі дзеці, як і афішу да яе. Увазе наведвальнікаў юныя музейнікі прапанавалі дзесяць гісторый, якія яны распавялі праз экслібрысы. Аповеды кранаюць сваёй фантазіяй і шчырымі пачуццямі. Яны пра вечнае кола жыцця і дружбу, пра ўзаемаадносіны фантастычных і рэальных персанажаў, пра жаданні і мары, пра пошукі свайго шляху і шмат што іншае.
Працэс стварэння выставачнага праекта атрымаўся настолькі каштоўным і цікавым, што пазнаёміцца з ім лічым проста абавязковым, а для гэтага прапануем відэапрэзентацыю музейнага эксперыменту.
Фота мерапрыемства глядзіце тут.
Віншуем усіх з Міжнародным днём музеяў і запрашаем пазнаёміцца з унікальнай выставай!
Экспазіцыя будзе працаваць у музеі кнігі (пам. 347) да 18 чэрвеня 2021 г.
Дата яе завяршэння можа быць зменена.
Час работы выставы адпавядае рэжыму работы музея кнігі.
Уваход – па чытацкім білеце або білеце сацыякультурнага цэнтра.
Матэрыял пададзены навукова-даследчым аддзелам кнігазнаўства.