16 чэрвеня адбыўся семінар “Электронныя рэсурсы EBSCO для бібліятэк і ВНУ”, арганізаваны Нацыянальнай бібліятэкай Беларусі сумесна з кампаніяй “EBSCO Information Services”.
“EBSCO Information Services” – адзін з вядучых пастаўшчыкоў замежных навуковых электронных інфармацыйных рэсурсаў (электронных кніг, часопісаў, патэнтаў і пошукавых сэрвісаў) па медыцыне, прыродазнаўчых, дакладных і гуманітарных навуках.
Семінар адкрыў дырэктар Нацыянальнай бібліятэкі Беларусі Раман Матульскі, правяла – намеснік дырэктара па інфармацыйных рэсурсах Таццяна Кузьмініч.
Падчас семінара выступіў дырэктар па рэгіянальным развіцці ў Расіі, Беларусі і Малдове Андрэй Сакалоў, які прэзентаваў мультыдысцыплінарныя і тэматычныя паўнатэкставыя часопісныя базы даных Academic Search Ultimate, Business Source Ultimate, Sociology Source Ultimate, Humanities Source Ultimate, патэнтную базу даных Global Patents, а таксама прадставіў агляд новых функцыянальных магчымасцей EBSCO Discovery Service.
Трэнер, тэхнічны спецыяліст па рабоце з кліентамі EBSCO ў Расіі і краінах СНД Таміла Міркамалава правяла трэнінг “EBSCOHost – навігацыя пошуку. Практычныя прыклады пошуку, работа з поўным тэкстам, асабісты кабінет”.
У семінары прынялі ўдзел кіраўнікі і спецыялісты бібліятэк, навуковыя супрацоўнікі, выкладчыкі вышэйшых навучальных устаноў, карыстальнікі інфармацыйных рэсурсаў.