18 снежня 2008 года ў Нацыянальнай бібліятэцы Беларусі адбылося ўрачыстае адкрыццё кніжна-дакументальнай выстаўкі «Гісторыя Беларусі: станаўленне нацыянальнай дзяржаўнасці», падрыхтаванай сумесна з Нацыянальным архівам Рэспублікі Беларусь і прымеркаванай да 90-годдзя з часу абвяшчэння БССР.
Нацыянальная бібліятэка Беларусі ў сваёй частцы экспазіцыі прадставіла каля 300 выданняў: энцыклапедычныя даведнікі, працы, даследаванні, зборнікі дакументаў і матэрыялаў, вучэбныя дапаможнікі, манаграфіі і г. д., якія распавядаюць пра ўсе бакі жыцця рэспублікі ў пэўны час. Нацыянальны архіў Рэспублікі Беларусь экспануе 100 арыгінальных дакументаў: дакументы Беларускага Нацыянальнага Камітэта, Статутныя граматы Беларускай Народнай Рэспублікі, мандаты дэлегатаў 6-й Паўночна-Заходняй канферэнцыі РКП(б), якая праходзіла ў Смаленску, пратаколы пасяджэнняў Цэнтральнага бюро Камуністычнай партыі бальшавікоў Беларусі. Маніфест аб абвяшчэнні БССР прадстаўлены ў арыгіналах з рукапіснымі праўкамі і ў першых афіцыйных публікацыях.
У мерапрыемстве прынялі ўдзел намеснік дырэктара Нацыянальнай бібліятэкі Беларусі па навуковай рабоце і сувязях з грамадскасцю Л.Г. Кірухіна, дырэктар Дэпартамента па архівах і справаводству Міністэрства юстыцыі Рэспублікі Беларусь, кандыдат гістарычных навук У.І. Адамушка, дырэктар Інстытута гісторыі НАН Беларусі, доктар гістарычных навук А.А. Каваленя, прафесар Беларускага дзяржаўнага універсітэта, доктар гістарычных навук У.Ф. Ладысеў, загадчык аддзела публікацый дакументаў Нацыянальнага архіва Рэспублікі Беларусь, кандыдат гістарычных навук В.У. Скалабан.
Тэлефон для даведак: 293-29-80, 293-27-67.
Е-mail: pr@nlb.by