19–21 мая 2011 г. адбудзецца II Форум бібліятэкараў Беларусі “Гуманітарна-асветніцкая дзейнасць бібліятэк у кантэксце агульначалавечых каштоўнасцей і беларускай дзяржаўнасці”.
Яго арганізатарамі з’яўляюцца Міністэрства культуры Рэспублікі Беларусь, грамадскае аб’яднанне “Беларуская бібліятэчная асацыяцыя”, дзяржаўная ўстанова “Нацыянальная бібліятэка Беларусі” і Лагойскі раённы выканаўчы камітэт.
Адкрыццё форуму адбудзецца 19 мая а 10-й гадзіне ў дзяржаўнай тэатральна-відовішчнай установе “Маладзёжны тэатр эстрады” (г. Мінск, вул. Маскоўская, 18а). Секцыйныя пасяджэнні будуць праходзіць 20–21 мая ў пансіянаце “Рудня” Лагойскага раёна.
У рабоце канферэнцыі возьмуць удзел больш за 150 дэлегатаў з Беларусі – вядучыя спецыялісты бібліятэк, адукацыйных устаноў, прадстаўнікі заканадаўчай сферы і выканаўчай улады.
На пленарным і секцыйных пасяджэннях плануецца абмеркаванне ролі бібліятэкі ў інавацыйнай стратэгіі развіцця грамадства; праблем удасканалення заканадаўчай базы і сістэмы дзяржаўнага рэгулявання; інфармацыйнага забеспячэння інавацыйных дзяржаўных праектаў у сферы культуры, навукі і адукацыі; узаемадзеяння бібліятэк па стварэнні і выкарыстанні інфармацыйных рэсурсаў; дзейнасці бібліятэк у рэалізацыі права грамадзян на свабодны доступ да электронных рэсурсаў; навуковага і кадравага забеспячэння інавацыйнага развіцця бібліятэчнай справы.
У рамках форуму запланавана правядзенне круглага стала “Эфектыўнае выкарыстанне кадравага патэнцыялу бібліятэк: арганізацыйна-кіраўнічы аспект”, які адбудзецца 19 мая ў 13.30 ва ўстанове адукацыі “Беларускі дзяржаўны ўніверсітэт культуры і мастацтваў”. У мерапрыемстве возьмуць удзел прадстаўнікі Міністэрства культуры Рэспублікі Беларусь, Міністэрства працы і сацыяльнай абароны Рэспублікі Беларусь, Міністэрства эканомікі Рэспублікі Беларусь, Міністэрства фінансаў Рэспублікі Беларусь, Нацыянальнага статыстычнага камітэта Рэспублікі Беларусь. Работа круглага стала накіравана на выпрацоўку адзіных рашэнняў у пытаннях арганізацыйнага і нарматыўна-прававога рэгулявання бібліятэчнай кадравай палітыкі.
Вынікам калектыўнага абмеркавання стане выпрацоўка рэзалюцыі форуму, якая зафіксуе прынятыя рашэнні па далейшым развіцці бібліятэчнай справы краіны.