26 кастрычніка ў бібліятэцы адбылося пасяджэнне ўдзельнікаў II Міжнароднага сеткавага праекта “ЧтениеPRoДвижение”.
Мэта мерапрыемства – развіццё чытацкай культуры пры дапамозе фарміравання матывацыі і ўстойлівай цікавасці да чытання, пашырэнне чытацкага кругагляду, стымуляванне асобаснага і інтэлектуальнага развіцця на аснове выкарыстання магчымасцей сучаснага інфармацыйна-камунікацыйнага асяроддзя.
Сёння ў Рэспубліцы Беларусь створаны ўсе ўмовы для падтрымкі актыўнага чытання дзяцей і дарослых. Дзейнасць літаратараў, журналістаў, прадстаўнікоў філалагічнай і педагагічнай супольнасцей, грамадскіх аб’яднанняў нацэлена на актуалізацыю і развіццё чытацкага вопыту беларусаў.
Арганізатары праекта на пасяджэннях сесій абмеркавалі праблемы прыцягнення ўвагі ўсіх чытачоў да сучаснай літаратуры, традыцыі і інавацыі ў сучасным літаратурным працэсе, адукацыйныя і выхаваўчыя аспекты чытання.
Намеснік дырэктара Нацыянальнай бібліятэкі Беларусі па навуковай рабоце і выдавецкай дзейнасці Аляксандр Суша ў прывітальным слове звярнуў увагу на даследчую работу, якую праводзіць Нацыянальная бібліятэка па вывучэнні цікавасці розных катэгорый грамадзян Беларусі да чытання. Ён падкрэсліў, што колькасць чытачоў не змяншаецца: і дзеці, і дарослыя па-ранейшаму любяць кнігі, з часам мяняецца толькі носьбіт інфармацыі.
У рамках мерапрыемства адбылася прэзентацыя інтэрнэт-рэсурсу “КНІГАСВЕТ”, дзе чытачы, аўтары і выдаўцы змогуць абменьвацца чытацкім вопытам, абмяркоўваць цікавыя кнігі, пашыраць уяўленні пра сучасную літаратуру Беларусі.
У час форуму працавала выстаўка “Сучасная літаратура Беларусі: ProСлова”, дзе былі прадстаўлены кнігі і дзіцячыя творчыя работы. Таксама прайшла творчая сустрэча чытачоў з пісьменнікамі Беларусі.
Напрыканцы мерапрыемства адбылася ўрачыстая цырымонія ўзнагароджання пераможцаў II Міжнароднага сеткавага праекта “ЧтениеPRoДвижение”.
