6–10 чэрвеня Нацыянальная бібліятэка Беларусі возьме ўдзел у Міжнароднай спецыялізаванай выставе ХХVIII Міжнароднага форуму па інфармацыйна-камунікацыйных тэхналогіях “ТІБО”, якая пройдзе ў ШКСК “Мінск-арэна”.
У год свайго 100-годдзя на цэнтральнай экспазіцыі “Беларусь – лічбавая дзяржава” Нацыянальная бібліятэка прэзентуе самыя значныя навуковыя, адукацыйныя і сацыякультурныя праекты, рэалізаваныя ёю.
Наведвальнікі змогуць пазнаёміцца як з новымі, так і папулярнымі ўжо ў карыстальнікаў рэсурсамі і паслугамі бібліятэкі, такімі як:
- Дзяржаўны рэестр кніжных помнікаў Беларусі
- Анлайн-энцыклапедыя “Беларусь у асобах і падзеях”
- Электронны каталог Нацыянальнай бібліятэкі Беларусі
- Віртуальная чытальная зала Нацыянальнай бібліятэкі Беларусі
- Служба электроннай дастаўкі дакументаў
- Алічбоўка і рэстаўрацыя дакументаў
- Вонкавае электроннае светлавое табло будынка НББ
Тут можна будзе “пагартаць” “Кнігу Беларусі XIV–XVIII стагоддзяў”, “Рукапісы сучасных беларускіх аўтараў з фондаў Нацыянальнай бібліятэкі Беларусі”, часопісы з калекцыі “Мода и время” і іншых паўнатэкставых рэсурсаў НББ, доступ да якіх прадстаўлены ў інтэрнэце. Усяго – больш за 3 000 лічбавых копій дакументаў.
Задумаліся аб захаванні сямейнай гісторыі? Не ведаеце, як і дзе аднавіць кнігі з дароўнымі надпісамі, лісты... і захаваць старыя запісы на відэакасетах? Майстар-класы па рэстаўрацыі і алічбоўцы дакументаў прадэманструюць гасцям выставы паслугі бібліятэкі па аднаўленні пашкоджаных старажытных і сучасных папяровых дакументаў і алічбоўцы відэа- і рукапісных дакументаў.
Спецыялісты пакажуць, як можна аператыўна адрамантаваць кнігу, як правільна склеіць разарваны ліст, як захаваць стары відэазапіс, як зрабіць копію дакумента на патокавым сканары.
Чакаем гасцей на цэнтральнай экспазіцыі!
Далучайцеся да юбілею Нацыянальнай бібліятэкі Беларусі!
Тэлефон для даведак: (8 017) 293 27 62.
Матэрыял пададзены аддзелам сувязей з грамадскасцю.