Споўнілася 80 гадоў аўтарытэтнаму бібліятэказнаўцу, кандыдату педагагічных навук, прафесару Ліліі Адамаўне Дзямешка.
Бягуць імкліва год за годам…
Ды ў свой чарговы юбілей
Ты не чакай узнагароды:
Ты – узнагарода для людзей.
Ты – для ўсіх нас узнагарода,
Для люду блізкага ўсяго
І для ўсяго свайго народа,
Бо верная дачка яго.
Л.А. Дзямешка “Роднаснай душы”
Высокі прафесіяналізм, шырокая эрудыцыя і актыўная жыццёвая пазіцыя Ліліі Адамаўны выклікаюць заслужаную павагу і з’яўляюцца прыкладам для ўсіх, хто працаваў з ёй доўгія гады, і ўсіх, хто ведае яе. Вядомы вучоны, бібліятэказнавец, яна прайшла шлях ад выкладчыка да прафесара і заслужыла павагу і аўтарытэт не толькі сярод айчыннай бібліятэчнай супольнасці, але і шырока за яе межамі.
Лілія Дзямешка нарадзілася 30 сакавіка 1938 года ў в. Замошша Салігорскага раёна Мінскай вобласці ў сям’і настаўнікаў. Пасля заканчэння Уздзенскай сярэдняй школы і правучыўшыся год у Смілавіцкім сельскагаспадарчым тэхнікуме (цяпер Смілавіцкі дзяржаўны аграрны каледж), паступіла на бібліятэчны факультэт Мінскага дзяржаўнага педагагічнага інстытута імя М. Горкага (цяпер Беларускі дзяржаўны педагагічны ўніверсітэт імя М. Танка), які скончыла ў 1961 годзе. Працавала інспектарам па бібліятэчнай справе ў Мінскім абласным упраўленні культуры, метадыстам у Мінскай абласной бібліятэцы імя А.С. Пушкіна, галоўным бібліятэкарам навукова-метадычнага аддзела Дзяржаўнай бібліятэкі БССР імя У.І. Леніна (цяпер Нацыянальная бібліятэка Беларусі).
У 1972 годзе, атрымаўшы пэўны практычны вопыт падчас дванаццацігадовага стажу бібліятэчнай работы, паступіла ў аспірантуру пры Мінскім дзяржаўным педагагічным інстытуце імя М. Горкага. Пасля заканчэння аспірантуры з 1976 года працавала выкладчыкам на бібліятэчным факультэце (цяпер факультэт інфармацыйна-дакументных камунікацый) Мінскага інстытута культуры (Беларускага дзяржаўнага ўніверсітэта культуры і мастацтваў). У 1979 годзе паспяхова абараніла кандыдацкую дысертацыю і атрымала навуковую ступень кандыдата педагагічных навук, а ў 1984 годзе – вучонае званне дацэнта. З 1994 года працавала на пасадзе прафесара кафедры бібліятэказнаўства (цяпер кафедра бібліятэчна-інфармацыйнай дзейнасці).
Галіна навуковых інтарэсаў Ліліі Адамаўны шырокая. Яна з’яўляецца аўтарам каля 400 навуковых работ у беларускім і замежным друку, навучальных і навукова-практычных дапаможнікаў па пытаннях сутнасці бібліятэчнай прафесіі, сацыяльнай ролі бібліятэкі ў грамадстве, кнігі і чытання ў розных этнічных групах, выхавання і адукацыі карыстальнікаў бібліятэк, інавацыйных і традыцыйных тэхналогій у выкарыстанні інфармацыйных рэсурсаў бібліятэк і доступу да іх, бібліятэчнай тэрміналогіі, рэкламавання бібліятэчнай прадукцыі.
На працягу 36 гадоў Л.А. Дзямешка выкладала ў Беларускім дзяржаўным універсітэце культуры і мастацтваў і на працягу 25 гадоў кіравала навукова-даследчай работай кафедры. За гэты час яна распрацавала напрамкі і методыку пяці буйных кафедральных комплексных даследаванняў, у якіх сама прыняла актыўны ўдзел.
Па ініцыятыве і пры непасрэдным удзеле Ліліі Адамаўны было праведзена даследаванне стану чытання польскай кнігі ў Беларусі і беларускай – у Польшчы, вынікам чаго сталі арганізаваныя Беларускім універсітэтам культуры і Варшаўскім універсітэтам міжнародныя канферэнцыі.
Яшчэ адзін напрамак яе даследаванняў – тэрміналогія ў галіне бібліятэчнай справы, бібліятэказнаўства і кнігазнаўства. У суаўтарстве з прафесарам В.Е. Лявончыкавым і намеснікам дэкана факультэта дадатковай адукацыі Беларускага дзяржаўнага ўніверсітэта культуры і мастацтваў Р.І. Саматыя ўпершыню ў Беларусі распрацаваны і выдадзены “Русско-белорусский словарь библиотечных и библиографических терминов”.
Лілія Адамаўна ўдала спалучае навукова-педагагічную дзейнасць з творчай. Яна – паэтэса. Вершы яе, лірычныя, прасякнутыя любоўю да маці, роднай зямлі, беларускай мовы, сяброў і калег, публікуюцца на старонках перыядычнага друку, а таксама ўваходзяць у зборнік “Мелодии” Беларускага дзяржаўнага ўніверсітэта культуры і мастацтваў (1996) і сістэматычна – у выданні творчага аб’яднання ўніверсітэта “Букет” – “Завіруха кропель” (2004), “Каліва” (2005), “Кветка ў мегаполісе” (2006), “Дар зямны” (2007), “Весніцы” (2008). У 2012 годзе выйшаў з друку яе зборнік вершаў “Мне жыццё ўяўляецца полем”.
Уклад Л.А. Дзямешкі ў развіццё бібліятэчнай справы краіны, праца па захаванні культурнай і гістарычнай спадчыны атрымалі высокую ацэнку дзяржавы. Сведчанне таму – уручаныя ёй узнагароды: медаль “Да 100-годдзя з дня нараджэння У.І. Леніна” (1970), Ганаровая грамата Вярхоўнага Савета Рэспублікі Беларусь (1995).
Ліліі Адамаўне ад усяго калектыву Нацыянальнай бібліятэкі Беларусі – самыя цёплыя віншаванні з юбілеем і пажаданні моцнага здароўя, невычэрпнай энергіі і сіл, творчага натхнення, шчасця і дабрабыту!