30–31 кастрычніка ў Маскве, у Расійскай дзяржаўнай бібліятэцы, прайшла міжнародная канферэнцыя “Развіццё нацыянальнай літаратуры і чытання ў краінах СНД”.
На працягу двух дзён у фармаце круглых сталоў прадстаўнікі бібліятэк Азербайджана, Арменіі, Беларусі, Казахстана, Кіргізіі, Малдовы, Расіі, Узбекістана і Таджыкістана дзяліліся вопытам і абмяркоўвалі праблемы ролі бібліятэк у сучасным грамадстве, кнігавыдання і кнігараспаўсюджвання ў СНД, супрацоўніцтва бібліятэк па папулярызацыі літаратуры і чытання.
Нацыянальную бібліятэку Беларусі на мерапрыемстве прадставіла Марына Пшыбытка, загадчыца навукова-даследчага аддзела бібліятэказнаўства.
Па выніках работы была выпрацавана рэзалюцыя, у якой удзельнікі адзначылі неабходнасць развіваць ініцыятывы па перакладах лепшых літаратурных твораў на нацыянальныя мовы народаў краін СНД, ініцыятывы па ўдзеле бібліятэк у міждзяржаўных акцыях, правядзенні сумесных сацыялагічных і комплексных навуковых даследаванняў у галіне кнігі і чытання, аналізе сучаснага стану прыгранічнага супрацоўніцтва бібліятэк.
Удзельнікі выказалі пажаданне часопісу “Вестник Библиотечной ассамблеи Евразии” і прафесійным перыядычным выданням краін СНД увесці ў іх змест спецыяльны раздзел “Кніга і чытанне ў сучасным грамадстве: тэндэнцыі і прагнозы”.
Матэрыял прадастаўлены навукова-даследчым аддзелам бібліятэказнаўства.