14–15 чэрвеня ў Расійскай нацыянальнай бібліятэцы прайшла ХХ Навуковая канферэнцыя “Санкт-Пецярбург і беларуская культура”, прысвечаная памяці В. Скалабана і 20-годдзю ўстанаўлення дыпламатычных адносін паміж Расіяй і Беларуссю.
Арганізатарамі канферэнцыі выступілі Расійская нацыянальная бібліятэка (г. Санкт-Пецярбург) і Санкт-Пецярбургская асацыяцыя беларусістаў. У канферэнцыі прынялі ўдзел вучоныя, выкладчыкі, кіраўнікі і супрацоўнікі бібліятэк, навуковых і вучэбных устаноў з Расіі, Беларусі, Польшчы, Японіі. З прывітальным словам да ўдзельнікаў канферэнцыі звярнуўся генеральны дырэктар Расійскай нацыянальнай бібліятэкі Антон Уладзіміравіч Ліхаманаў.
У дакладах спецыялістаў былі разгледжаны пытанні дыпламатычных адносін і культурнага супрацоўніцтва Расіі і Беларусі на сучасным этапе, гісторыя інтэграцыйных працэсаў у расійска-беларускіх дыпламатычных адносінах, лёсы вядомых дзеячаў беларускай культуры (такіх як Янка Купала і Ян Баршчэўскі) у Санкт-Пецярбургу, а таксама ўдзел прадстаўнікоў іншых народаў і дзяржаў у культурным жыцці Беларусі. Цэлы шэраг дакладаў быў прысвечаны лёсу культурнай, у тым ліку кніжнай, спадчыны Беларусі ў замежных краінах. Дакладчыкамі былі вывучаны факты і разгледжаны падзеі з гісторыі міжкультурнага і міжканфесійнага ўзаемадзеяння ў Беларусі.
З дакладам пра перспектывы беларуска-расійскага супрацоўніцтва ў галіне факсімільнага выдання кніжных помнікаў выступіў намеснік дырэктара Нацыянальнай бібліятэкі Беларусі па навуковай рабоце і выдавецкай дзейнасці Аляксандр Аляксандравіч Суша.
Чытайце таксама: