27–29 мая спартыўная каманда Нацыянальнай бібліятэкі Беларусі ўзяла ўдзел у ХV Рэспубліканскай спартакіядзе работнікаў культуры.
У гэтыя вясновыя дні Рэспубліканскі цэнтр алімпійскай падрыхтоўкі “Стайкі” Мінскага раёна сабраў 32 каманды (больш за 400 чалавек) падведамасных арганізацый Міністэрства культуры, а таксама балельшчыкаў і аматараў актыўнага адпачынку.
Зборная каманда Нацыянальнай бібліятэкі ўзяла ўдзел у спаборніцтвах па наступных відах спорту: міні-футбол, лёгкаатлетычны крос, настольны тэніс, гіравы спорт, валейбол і дартс.
Па выніках спаборніцтваў вядучы інжынер інфармацыйна-вылічальнага аддзела Валерый Антонаў заняў II месца сярод мужчын па настольным тэнісе.
Наш калектыў паказаў годны вынік і заняў IV агульнакаманднае месца.
Віншуем каманду Нацыянальнай бібліятэкі Беларусі і жадаем ёй далейшых спартыўных перамог!
Рэспубліканская спартакіяда праводзіцца ў мэтах шырокай прапаганды і далейшага развіцця фізічнай культуры і спорту ў працоўных калектывах арганізацый Міністэрства культуры Рэспублікі Беларусь. Асноўныя задачы – далучэнне работнікаў галіны да здаровага ладу жыцця і фізкультурна-аздараўленчых і спартыўна-масавых мерапрыемстваў, наладжванне сяброўскіх сувязей паміж калектывамі.
Арганізатарамі спартакіяды з’яўляюцца: Міністэрства спорту і турызму Рэспублікі Беларусь, Міністэрства культуры Рэспублікі Беларусь, Беларускі прафесійны саюз работнікаў культуры, інфармацыі, спорту і турызму, Рэспубліканскі вучэбна-метадычны цэнтр фізічнага выхавання насельніцтва, Белспортзабеспячэнне.
Матэрыял пададзены аддзелам сувязей з грамадскасцю.