20 лістапада прайшоў круглы стол “Кніжная культура праваслаўнай царквы ў Беларусі”, а таксама прэзентацыя найноўшых выданняў вядомага беларускага гісторыка з Польшчы А. Мірановіча.
Мерапрыемства арганізавана Нацыянальнай бібліятэкай Беларусі ў межах Года кнігі пры падтрымцы Культурнага цэнтра Беларусі пры Пасольстве Рэспублікі Беларусь у Рэспубліцы Польшча.
Прафесар Беластоцкага ўніверсітэта Антон Мірановіч займаецца даследаваннем беларуска-расійска-польскіх узаемасувязей, гісторыяй праваслаўнай царквы ў Польшчы, Беларусі і Расіі, вывучае культуру беларускай нацыянальнай меншасці ў Польшчы. З’яўляецца членам прэзідыума Міжнароднай акадэміі вывучэння нацыянальных меншасцей, Міжнароднай асацыяцыі беларусістаў, Усходнеславянскай камісіі Польскай акадэміі навук у Кракаве, Польска-расійскай гістарычнай камісіі і Міжнароднай камісіі гісторыі царквы Польскай акадэміі навук.
Круглы стол адбыўся з удзелам беларускіх навукоўцаў, прайшла прэзентацыя і перадача ў фонд бібліятэкі выданняў А. Мірановіча, прысвечаных гісторыі праваслаўнай царквы на Беларусі.
У мерапрыемстве ўзялі ўдзел намеснік міністра культуры Рэспублікі Беларусь Тадэвуш Стружэцкі, намеснік дырэктара Нацыянальнай бібліятэкі Беларусі па навуковай рабоце і выдавецкай дзейнасці Аляксандр Суша, дырэктар Беларускага дзяржаўнага архіва-музея літаратуры і мастацтва Ганна Запартыка, намеснік дырэктара па навуковай рабоце Інстытута мовы і літаратуры імя Якуба Коласа і Янкі Купалы Нацыянальнай акадэміі навук Беларусі Сяргей Гаранін, доктар навук, прафесар Адам Мальдзіс, галоўны архівіст аддзела інфармацыі і навуковага выкарыстання дакументаў Нацыянальнага гістарычнага архіва Беларусі Уладзімір Дзянісаў, а таксама іншыя прадстаўнікі бібліятэк, музеяў і архіваў.
 |
 |
 |
 |
 |
 |
