27 красавіка ў бібліятэцы пройдзе комплекс мерапрыемстваў, прысвечаных Сусветнаму дню кнігі і аўтарскага права, а таксама Міжнароднаму дню інтэлектуальнай уласнасці.
З 10.00 да 12.00 у Міжнародным прэс-цэнтры (пам. 308) адбудзецца круглы стол “Аўтарскае права і ліцэнзіі Creative Commons у Беларусі: за і супраць".
У пасяджэнні прымуць удзел спецыялісты Цэнтра па калектыўным кіраванні маёмаснымі правамі Нацыянальнага цэнтра інтэлектуальнай уласнасці, Нацыянальнага цэнтра заканадаўства і прававых даследаванняў, прадстаўнікі арганізацыі “Creative Commons” у Беларусі, кіраўнікі і спецыялісты ўстаноў культуры і адукацыі. Удзельнікі круглага стала абмяркуюць пытанні, якія ўзнікаюць у паўсядзённай дзейнасці інфармацыйных устаноў у галіне аўтарскага і сумежных правоў.
А 15-й гадзіне ў галерэі "Лабірынт" (3-ці паверх) пройдзе культурна-асветніцкая акцыя "Майстры беларускай культуры. Яўген Глебаў”, прысвечаная творчай спадчыне Яўгена Аляксандравіча Глебава, кампазітара, народнага артыста БССР і СССР.
Сярод ганаровых гасцей мерапрыемства – Ларыса Васільеўна Глебава, захавальніца музычнай спадчыны кампазітара, якая перадала правы на выкарыстанне электронных копій рукапісаў аўтара ў электроннай бібліятэцы Нацыянальнай бібліятэкі Беларусі.
У рамках мерапрыемства будзе прэзентаваны электронны рэсурс “Майстры беларускай культуры. Яўген Глебаў”, дзе сабраны копіі ўнікальных нотных рукапісаў аўтара. Тут прадстаўлена ўся разнастайнасць музычных жанраў: ад песні і эстраднай п'есы да сімфоніі і канцэрта.
Музыка Яўгена Глебава заваявала велізарную папулярнасць і заслужана атрымала шырокае прызнанне. Таленавіты кампазітар стварыў дзве оперы (“Твая вясна”, “Майстар і Маргарыта”), шэсць балетаў (“Мара”, “Альпійская балада”, “Выбранніца”, “Курган”, “Тыль Уленшпігель”, “Маленькі прынц”), сімфоніі (Першая “Партызанская”, “Альпійская сімфонія-балада” і інш.), фартэпіянную музыку (“Першы вальс”, “Фантастычныя танцы” і інш.), а таксама працаваў у розных жанрах.
Наведвальнікі акцыі пачуюць урыўкі з музычных твораў кампазітара ў выкананні навучэнцаў дзіцячай музычнай школы мастацтваў № 10 імя Я.А. Глебава.
Балеты Яўгена Глебава, пастаўленыя на сцэнах Вялікага тэатра ў Маскве і Марыінскага тэатра ў Санкт-Пецярбургу, захаплялі і гледачоў Фінскай нацыянальнай оперы ў Хельсінкі. Новая рэдакцыя балета “Тыль Уленшпігель”, створаная кампазітарам сумесна з харэографам Валянцінам Елізар'евым для Марыінскага тэатра пад назвай “Легенда пра Уленшпігеля”, была прадстаўлена на сцэне Вялікага тэатра оперы і балета ў Мінску.
У рамках акцыі наведвальнікі таксама змогуць азнаёміцца з кніжнай выстаўкай, на якой будуць прадстаўлены матэрыялы з фондаў Нацыянальнай бібліятэкі Беларусі – асобныя выданні пра жыццё і творчасць Я. Глебава, зборнікі яго музычных твораў і інш.
