6 чэрвеня ў Нацыянальнай бібліятэцы Беларусі адбылося пасяджэнне круглага стала “Лабіраванне інтарэсаў бібліятэк – ад работы ў сферы палітыкі да супрацоўніцтва з фондамі, якія аказваюць падтрымку ўстановам культуры”.
Круглы стол быў арганізаваны ў рамках семінара “Будучыня бібліятэк”. Арганізатарамі мерапрыемства выступілі Інстытут імя Гётэ ў Мінску і Нацыянальная бібліятэка Беларусі.
У пасяджэнні круглага стала прынялі ўдзел звыш 70 дэлегатаў з Беларусі, Расіі, Украіны – кіраўнікі і спецыялісты публічных і спецыяльных бібліятэк. У якасці рэферэнта на круглым стале выступаў спадар Клаўс-Петэр Бётгер, дырэктар Гарадской бібліятэкі Эсена (Германія), прэзідэнт Еўрапейскага бюро бібліятэчных, інфармацыйных і дакументацыйных асацыяцый (European Bureau of Library, Information and Documentation Associations).
Першая частка круглага стала была прысвечана тэме лабіравання інтарэсаў як абавязковай умовы існавання сучаснай бібліятэкі сёння і будучым. Спадар Бётгер на прыкладзе сваёй бібліятэкі паказаў, якім чынам неабходна выбудоўваць камунікацыю на ўзроўні ўлад і адміністрацыі і якія пытанні бібліятэка можа вырашаць пры эфектыўным лабіраванні сваіх інтарэсаў.
Другая частка мерапрыемства ўключала прэзентацыю Еўрапейскага бюро бібліятэчных, інфармацыйных і дакументацыйных асацыяцый (EBLIDA), створанага ў 1992 г. Спадар Бётгер пазнаёміў удзельнікаў круглага стала з асноўнымі кірункамі і вынікамі дзейнасці бюро, падкрэсліў важнасць дадзенай арганізацыі ў лабіраванні інтарэсаў бібліятэк на міждзяржаўным узроўні.
Выступленне спадара Бётгера выклікала жывы інтарэс у аўдыторыі. Пад час дыскусіі былі вызначаны асноўныя праблемныя пытанні, абмеркаванне якіх працягнецца на запланаваных у рамках семінара “Будучыня бібліятэк” мерапрыемствах.