11 красавіка ў Нацыянальнай бібліятэцы Беларусі прайшло пасяджэнне круглага стала, прысвечанае 20-годдзю з дня выхаду ў свет першага нумара “Беларускага гістарычнага часопіса”.
Круглы стол быў арганізаваны выдавецтвам “Пачатковая школа” і Нацыянальнай бібліятэкай Беларусі.
“Беларускі гістарычны часопіс” – адзіны ў Рэспубліцы Беларусь штомесячны навукова-тэарэтычны, навукова-метадычны ілюстраваны часопіс па гістарычных навуках і методыцы выкладання гісторыі для ўсіх тыпаў навучальных устаноў. Выдаецца з сакавіка 1993 года. Заснавальнікамі часопіса з’яўляюцца Міністэрства адукацыі Рэспублікі Беларусь, выдавецтва “Пачатковая школа”, Беларускі дзяржаўны ўніверсітэт, Інстытут гісторыі НАН Беларусі.
Галоўныя мэты часопіса – садзейнічаць выхаванню патрыятызму праз грунтоўнае вывучэнне гісторыі Беларусі ў кантэксце гісторыі еўрапейскай і сусветнай цывілізацый, папулярызацыі гістарычных ведаў.
За 20 гадоў існавання часопіса выпушчаны 164 нумары агульным тыражом каля 400 000 экземпляраў. У часопісе друкуюцца навуковыя, навукова-папулярныя, метадычныя матэрыялы па гісторыі Беларусі і ўсеагульнай гісторыі. Часопіс уключаны ў пералік навуковых выданняў Рэспублікі Беларусь для апублікавання вынікаў дысертацыйных даследаванняў. У ім друкаваліся артыкулы даследчыкаў больш чым з 20 краін свету, у тым ліку Вялікабрытаніі, Германіі, ЗША, Кітая, Латвіі, Літвы, Польшчы, Расіі, Сірыі, Украіны, Францыі i інш.
У пасяджэнні круглага стала ўзялі ўдзел вядомыя грамадскія і культурныя дзеячы Беларусі, арганізатары гістарычнай навукі i адукацыі, беларускія гісторыкі.