З нагоды 400-годдзя з дня заснавання Куцеінскага мужчынскага манастыра 15 верасня ў Оршы адбылася міжнародная навукова-практычная канферэнцыя “Куцеінскія чытанні”.
Нацыянальная бібліятэка Беларусі выступіла адным з суарганізатараў мерапрыемства і была прадстаўлена трыма дакладчыкамі. Вядучы бібліёграф інфармацыйна-аналітычнага аддзела Ніна Літвінка распавяла на канферэнцыі пра “Арыгінал выдання друкарні ў Любчы (з фондаў Расійскай дзяржаўнай бібліятэкі)”. У аддаленым фармаце загадчыца сектара навукова-даследчага аддзела кнігазнаўства Таццяна Карнілава прадставіла даклад на тэму “Трыфалагіён 1647 г. у фондзе Нацыянальнай бібліятэкі Беларусі”, а вядучы рэдактар выдавецкага аддзела Наталля Анапрэенка распрацавала тэму “Творчая спадчына Максіма Вашчанкі: традыцыі і наватарства”.
Тэма старадрукаў аказалася надзвычай запатрабаванай і зацікавіла прысутных. У гэты ж дзень сярод іншых урачыстых мерапрыемстваў, калекцыянер Уладзімір Ліхадзедаў перадаў у дар манастыру арыгінальнае выданне Трыфалагіёна (1647 г.).
Можна сказаць, што кнігавыданне ў Куцейне працягваецца і сёння. Так, у межах канферэнцыі адбылася прэзентацыя кнігі “Гісторыя Свята-Багаяўленскага Куцеінскага мужчынскага манастыра (1623–1918 гг.)” манаха Аўраама (Навумчыка). Манаграфія складаецца з трох раздзелаў: пра гісторыю Куцеінскагага манастыра ў складзе Рэчы Паспалітай, гісторыю манастыра ў складзе Расійскай імперыі, асобна пра архітэктуру і святыні гэтага месца. Кніга цікавая не толькі расповедам пра мінулае духоўнага прыстанішча, але і яскрава прадстаўленай карцінай некалькіх гістарычных эпох.
Шматлікія інтэлектуалы, навукоўцы, рэлігійныя асобы і проста зацікаўленыя людзі сабраліся ў гэты дзень разам, каб быць сведкамі і прадаўжальнікамі добрых традыцый духоўнасці і культуры.
Матэрыял падрыхтаваны Нінай Літвінкай, вядучым бібліёграфам інфармацыйна-аналітычнага аддзела.
