26 лютага ў Брэсцкім дзяржаўным універсітэце імя А.С. Пушкіна прайшоў семінар "Сучасныя падыходы да павышэння эфектыўнасці інфармацыйнага забеспячэння навуковай і адукацыйнай дзейнасці".
Мерапрыемства было арганізавана ўніверсітэтам сумесна з Нацыянальнай бібліятэкай Беларусі.
Удзельнікам быў прадстаўлены шырокі спектр аўтарытэтных сусветных электронных інфармацыйных рэсурсаў у сферы навукі і адукацыі. Пра магчымасці іх выкарыстання праз віртуальную чытальную залу НББ распавяла супрацоўніца аддзела карпаратыўнага ўзаемадзеяння Дар'я Столяр.
Загадчык сектара інфармацыйнага забеспячэння інавацыйнай дзейнасці Нацыянальнай бібліятэкі Беларусі Вячаслаў Брычкоўскі выклаў асноўныя перавагі ініцыятывы адкрытага доступу да навукова-адукацыйных рэсурсаў, якая з'яўляецца інавацыйнай бізнес-мадэллю арганізацыі навуковых камунікацый ва ўмовах лічбавай трансфармацыі грамадства.
У сваім дакладзе Вячаслаў Брычкоўскі распавёў таксама аб шырокіх магчымасцях выкарыстання рэсурсаў і інструментаў платформы Web of Science для павышэння эфектыўнасці навукова-даследчай дзейнасці ва ўніверсітэце.
Слухачам быў таксама прэзентаваны тэматычны сайт "Беларусь у інфармацыйнай прасторы", які з'яўляецца даведнікам па аўтарытэтных нацыянальных анлайн-рэсурсах. Вялікую цікавасць у прысутных выклікаў новы раздзел сайта, створаны ў рамках праекта "100 дзён да Вялікай Перамогі. Па старонках беларускіх газет 1945 г.".
Матэрыял прадастаўлены аддзелам карпаратыўнага ўзаемадзеяння.