11 сакавіка ў Нацыянальнай бібліятэцы Беларусі адбылася літаратурна-музычная вечарына “Мелодыя сэрца – мелодыя святла”, прысвечаная 200-годдзю з дня нараджэння сусветна вядомага польскага кампазітара Ф. Шапэна (1810–1849).
Нацыянальная бібліятэка Беларусі далучылася да агульнасусветнага працэсу святкавання юбілею заснавальніка польскай класічнай музыкі, кампазітара і піяніста Фрыдэрыка Шапэна і прадставіла ўласны культурны праект – літаратурна-музычную вечарыну “Мелодыя сэрца – мелодыя святла”.
Урачыстае мерапрыемства адкрыў дырэктар Нацыянальнай бібліятэкі Беларусі Раман Матульскі. Гасцей вечарыны віталі кіраўнік Нацыянальнай камісіі Рэспублікі Беларусь па справах ЮНЕСКА Уладзімір Шчасны, Надзвычайны і Паўнамоцны Пасол Рэспублікі Польшча ў Рэспубліцы Беларусь Генрык Літвін, дырэктар дзіцячай музычнай школы № 3 імя Ф. Шапэна г. Мінска Міхаіл Абражэвіч, загадчык аддзела галерэйна-выставачнай дзейнасці Нацыянальнай бібліятэкі Беларусі Фёдар Ястраб.
У рамках літаратурна-музычнай вечарыны адбылася прэзентацыя кніжна-ілюстрацыйнай выстаўкі “Паэт фартэпіяна”, на якой была прадстаўлена разгорнутая юбілейная экспазіцыя: кнігі, ноты, гуказапісы, альбомы, выяўленчыя матэрыялы, камплекты паштовак, электронныя выданні.
Адначасова адкрылася і мастацкая выстаўка “Мелодыя святла”, на якой свае работы, прысвечаныя вялікаму музыканту, прадставілі акварэлісты, жывапісцы, майстры фота і графікі.
Чароўнымі мелодыямі Фрыдэрыка Шапэна ўсіх прысутных парадавалі піяніст-віртуоз Аляксандр Палякоў, вучні дзіцячай музычнай школы № 3 імя Ф. Шапэна г. Мінска, гімназіі-каледжа мастацтваў імя І.А. Ахрэмчыка, студэнты Беларускай дзяржаўнай акадэміі музыкі, удзельнікі ўзорнага тэатра танца дзіцячай харэаграфічнай школы № 1. У вобразе маладога Шапэна выступіў вядучы вечара акцёр і музыкант Міхаіл Зуй.