Нацыянальная бібліятэка Беларусі ўзяла ўдзел у XVI Міжнароднай канферэнцыі “Central Asia: Інтэрнэт і інфармацыйна-бібліятэчныя рэсурсы ў навуцы, адукацыі, культуры і бізнесе”, якая адбылася 24–26 мая ў Бухары (Рэспубліка Узбекістан).
У рамках канферэнцыі прайшоў II Форум Садружнасці Незалежных Дзяржаў “Кніга і чытанне – стратэгічны рэсурс развіцця грамадства”, адбыліся пленарнае пасяджэнне, пяць секцыйных пасяджэнняў, круглыя сталы і майстар-класы, а таксама ўрачыстая цырымонія ўзнагароджання нагрудным знакам “Выдатнік інфармацыйна-бібліятэчнай справы”.
Канферэнцыя была накіравана на далейшае ўдасканаленне супрацоўніцтва інфармацыйна-бібліятэчных устаноў, навучальных устаноў, архіваў, музеяў і іншых арганізацый у галіне распрацоўкі і прымянення электронных інфармацыйных рэсурсаў у сферах навукі, адукацыі, культуры і бізнесу, пошук рашэнняў праблем бібліятэчнай справы, яе інавацыйнага развіцця. Форум накіраваны на аб’яднанне сумесных намаганняў спецыялістаў інфармацыйна-бібліятэчнай, выдавецка-паліграфічнай сферы і кніжнага гандлю па папулярызацыі чытання ў краінах Садружнасці Незалежных Дзяржаў, распрацоўку і выяўленне найбольш паспяховых метадычных праектаў па развіцці культуры чытання.
У мерапрыемствах узялі ўдзел каля 400 спецыялістаў з Узбекістана і больш чым 50 замежных дэлегатаў. Сярод іх – вучоны сакратар Нацыянальнай бібліятэкі Беларусі Наталля Есіс, якая расказала аб сацыякультурнай дзейнасці нашай бібліятэкі па папулярызацыі кнігі і чытання.
Арганізатарамі канферэнцыі выступілі: Агенцтва інфармацыі і масавых камунікацый пры Адміністрацыі Прэзідэнта Рэспублікі Узбекістан; Міждзяржаўны фонд гуманітарнага супрацоўніцтва дзяржаў – удзельніц СНД; Нацыянальная бібліятэка Узбекістана імя Алішэра Наваі; Агенцтва “Узархіў”; Ташкенцкі ўніверсітэт інфармацыйных тэхналогій імя Мухамада ал-Харазмій; Дзяржаўны інстытут мастацтваў і культуры Узбекістана.
Матэрыял пададзены Наталляй Есіс, вучоным сакратаром НББ.
