10 красавіка ў бібліятэцы прайшлі музейныя заняткі “Часопісы? Вельмі цікава!”. Дзеці і бацькі здзейснілі захапляльнае паглыбленне ў свет часопісаў.
Што мы ведаем пра часопісы (журналы)? Аказваецца, яны такія розныя і іх так шмат! Ёсць школьныя журналы, дзе настаўнікі выстаўляюць адзнакі. Ёсць часопісы, якія можна выпісаць на пошце ці купіць у кіёску. У чым іх адрозненне ад кніг, газет і інтэрнэт-выданняў? Усе гэтыя пытанні абмеркавалі разам на занятках.
Адным з першых часопісаў у Еўропе стаў “Journal des savants”, які выдаваўся ў Парыжы з 1665 года. Удзельнікі заняткаў змаглі яго ўбачыць, бо некаторыя нумары захоўваюцца ў фондзе Нацыянальнай бібліятэкі.
Дзеці пазнаёміліся з сучасным часопісам для дзяцей “Дуду”. Іх чакалі цікавыя заданні і коміксы. Сапраўдным сюрпрызам для ўдзельнікаў сталі “ажыўшыя” песні са старонак часопіса. У госці ў бібліятэку прыехалі ўзорны ансамбль народнай песні “Святкі” (кіраўнік М.І. Рудкоўская, акампаніятар К.А. Парынгоўская) і вакальная група “Первоцвет” Мінскага гарадскога педагагічнага каледжа (мастацкі кіраўнік А.І. Дрык, аранжыроўшчык А.К. Шыла).
Мерапрыемства было арганізавана ў рамках праекта “Клуб кніжных прафесараў”.
Матэрыял пададзены навукова-даследчым аддзелам кнігазнаўства.
