У лютым у музеі кнігі ў рамках праекта “Клуб кніжных прафесараў” былі арганізаваны заняткі “Ёган Гутэнберг”, прысвечаныя вынаходству кнігадрукавання ў Еўропе і дзейнасці нямецкага першадрукара.
Удзельнікі сустрэчы паразважалі, якую ролю адыграла стварэнне кнігадрукавання ў развіцці чалавецтва і чаму вынаходніцтва друку – адно з найважнейшых дасягненняў цывілізацыі. У Еўропе ў сярэднія вякі, звычайна ў кляштарах, кнігі перапісвалі ад рукі. Часта перапісчыкі трацілі гады на адну кнігу. У нямецкім горадзе Майнцы Ёган Гутэнберг вынайшаў тэхніку друку з дапамогай рухомых літар. Ім быў фактычна закладзены тэхнічны падмурак для будучых зменаў у галіне культуры і навукі. На занятках дзеці не толькі даведаліся, што такое літара, але і самі змаглі пабыць у ролі наборшчыкаў тэксту.
Юныя “прафесары” таксама даведаліся, што такое інкунабулы, ініцыялы і шрыфты. У XV–XVІ стагоддзях друкары выраблялі мноства друкаваных шрыфтоў, якія сталі асновай для сучасных. На занятках у гульнявой форме дзеці навучыліся бачыць іх разнастайнасць.
Знаёмства з гісторыяй еўрапейскага кнігадрукавання адбывалася з дапамогай дыялогу, гульняў і творчасці.