31 кастрычніка ў бібліятэцы адкрыецца выстаўка жывапісу Марыі Рэдко “Каля хаты”.
Што кідаецца ў вочы, калі вы выходзіце за парог хаты? Быццам бы ўсё звыкла. Аднак… навакольны свет больш цікавы і незвычайны, чым часам здаецца. Пакідаючы межы сваёй утульнай бяспечнай прасторы, мы трапляем у зменлівую рэчаіснасць, поўную прыгод, новых знаёмстваў і адкрыццяў. Пра гэта і не толькі – выстаўка таленавітай мастачкі з Брэста Марыі Рэдко.
Большасць прадстаўленых карцін створана падчас пленэраў у перыяд з 2016 па 2017 год. Грэчаскія Афіны, шумны Кішынёў Малдовы, маленькія вёсачкі Брэстчыны – Стойлы, Бездзеж і Какорыца... Кожнае месца, горад мае свой непаўторны дух, адметную атмасферу, якія мастак адчувае і потым перадае ў сваіх карцінах. На выстаўцы можна ўбачыць і партрэтны жывапіс – дзяўчаты з кветкамі, напісаныя з натуры. Спалучыўшы два ідэальныя кампаненты – прыгажосць дзяўчыны і прыгажосць прыроды, мастачка дадае ў кампазіцыю штосьці таямнічае і нерэальнае.
Выстаўка “Каля хаты” − гэта новы віток развіцця не толькі светаўспрымання Марыі Рэдко, але і тэхнічных прыёмаў жывапісу, які стаў больш “штрыховачным” і графічным. Год таму дзяўчына ўдзельнічала як мастак-аніматар у маляванні першага ў свеце поўнаметражнага анімацыйнага фільма “Ван Гог. З любоўю, Вінцэнт”. Гэты вопыт моцна паўплываў на яе творчасць – з часам у стылі маладой мастачкі пачаў выяўляцца почырк галандскага генія.
Вернісаж пачнецца а 16-й гадзіне ў галерэі “Панарама” (22-гі паверх).
31 кастрычніка ўваход на выстаўку свабодны, з 1 лістапада – складае кошт наведвання агляднай пляцоўкі.
Атрымаць асалоду ад прыгожых работ Марыі Рэдко можна да 15 снежня 2017 года.
Дата заканчэння работы выстаўкі можа быць зменена.
Тэлефоны для даведак: (8 017) 266 37 37, 293 28 23.
Е-mail: pr@nlb.by
