3 снежня ў фармаце відэаканферэнцыі адбыўся XXV Агульны сход членаў некамерцыйнага партнёрства “Бібліятэчная асамблея Еўразіі”.
У пасяджэнні ўзялі ўдзел кіраўнікі нацыянальных і дзяржаўных бібліятэк Арменіі, Казахстана, Кыргызстана, Малдовы, Расіі, Таджыкістана і Узбекістана, прадстаўнік Пастаяннай камісіі Міжпарламенцкай асамблеі СНД па культуры, інфармацыі, турызме і спорце.
Ад нашай краіны ўдзел у пасяджэнні прыняла генеральны дырэктар Нацыянальнай бібліятэкі Беларусі Аксана Кніжнікава.
На агульным сходзе абмяркоўвалася бягучая дзейнасць БАЕ, кадравыя пытанні і рэалізацыя сумесных ініцыятыў у найбліжэйшыя гады. З мэтай развіцця агульнай культурнай і навуковай прасторы бібліятэк дзяржаў – удзельніц СНД калегі абмеркавалі сумесную навукова-даследчую дзейнасць, пытанні развіцця нацыянальнай бібліяграфіі, сумесную працу па павышэнні кваліфікацыі спецыялістаў і інш.
Адным з пытанняў парадку сходу сталі выбары ў праўленне БАЕ на снежань 2021 г. – снежань 2025 г. Прэзідэнтам БАЕ быў абраны генеральны дырэктар расійскай дзяржаўнай бібліятэкі Вадзім Дуда, віцэ-прэзідэнтам – дырэктар Нацыянальнай бібліятэкі Арменіі Ганна Чулян. Віншуем калег з прызначэннем на пасады!
Пляцоўкай для правядзення XXVI Агульнага сходу членаў БАЕ ў 2022 годзе абрана Нацыянальная бібліятэка Беларусі.
Матэрыял пададзены аддзелам сувязей з грамадскасцю.