Святкаванне XXIII Дня беларускага пісьменства ў Рагачове 3–4 верасня 2016 г. запусціла зваротны адлік апошняга года перад святкаваннем 500-годдзя беларускага кнігадрукавання.
Нацыянальная бібліятэка Беларусі выступае адным з асноўных ініцыятараў падрыхтоўкі да гэтага агульнанацыянальнага свята, таму падчас Дня беларускага пісьменства падрыхтавала і правяла для гасцей і ўдзельнікаў урачыстасці вялікую праграму тэматычных мерапрыемстваў.
4 верасня на пляцоўцы Фестывалю кнігі і прэсы была прэзентавана першая дзіцячая трохтомная энцыклапедыя “Францыск Скарына” – вынік сумеснай работы намесніка дырэктара Нацыянальнай бібліятэкі Беларусі Аляксандра Сушы і калектыву выдавецтва “Беларуская энцыклапедыя імя П. Броўкі”. Тры тамы беларускай дзіцячай энцыклапедыі (“Францыск Скарына – чалавек-энцыклапедыя”, “Францыск Скарына – чалавек свету”, “Францыск Скарына – чалавек-легенда”) на аснове найнавейшых навуковых даследаванняў і найбагацейшага ілюстрацыйнага матэрыялу раскрываюць жыццёвы шлях і спадчыну першадрукара.
У гэты ж дзень, падчас урачыстага адкрыцця Дома кнігі ў Рагачове, дырэктар Нацыянальнай бібліятэкі Беларусі Раман Матульскі перадаў у дар Рагачоўскай цэнтральнай раённай бібліятэцы шматтомнае факсімільнае выданне “Кніжная спадчына Францыска Скарыны”. Агульнанацыянальны праект па перавыданні кніг беларускага першадрукара разлічаны на перыяд 2013–2017 гг. і прымеркаваны да 500-годдзя айчыннага кнігадрукавання. Па меры выхаду з друку зборы кніг бясплатна перадаюцца ў бібліятэкі, музеі і архівы Беларусі і іншых краін.
У дні святкавання Дня беларускага пісьменства Нацыянальная бібліятэка Беларусі таксама прадставіла грамадскасці экспазіцыю “500 гадоў беларускага кнігадрукавання”, якая дазволіла гасцям свята пазнаёміцца з унікальнымі прыкладамі беларускага кнігадрукавання XVII–XX стагоддзяў, выдавецкімі праектамі і ініцыятывамі Нацыянальнай бібліятэкі.
А на дзіцячай пляцоўцы Фестывалю кнігі і прэсы Нацыянальная бібліятэка Беларусі правяла для жыхароў і гасцей горада пазнавальна-забаўляльную праграму “Пазітыў ад Скарыны”, з дапамогай якой у даступнай і займальнай форме распавяла дзецям і іх бацькам пра галоўную постаць у гісторыі беларускага кнігадрукавання.