23 снежня ў канферэнц-зале для дзяцей бібліятэчных супрацоўнікаў адбыўся ранішнік “Навагоднія прыгоды”.
Навагоднія святы дзеці чакаюць з нецярпеннем: можна ператварыцца ў любімага героя, пакрасавацца ў прыгожым касцюме і, вядома, атрымаць падарунак ад самога Дзеда Мароза! Сёння ў прасторнай зале Нацыянальнай бібліятэкі сабраліся казачныя персанажы – мушкецёры, сняжынкі, прынцы і прынцэсы і нават разбойнікі.
Чароўная атмасфера панавала на працягу ўсяго прадстаўлення. Маленькія гледачы радасна сустрэлі Снягурку, якую добра ведаюць па казках, і, не адрываючыся, сачылі за кожным рухам любімых персанажаў. З задавальненнем удзельнічалі ў конкурсах і забаўках.
На гучны покліч дзятвы прыйшоў галоўны зімовы чараўнік у чырвоным футры з велізарным мяшком падарункаў. Дзед Мароз запаліў гірлянды на ёлачцы і падарыў дзецям сапраўднае чарадзейства. Хлопчыкі і дзяўчынкі ад душы павесяліліся на свяце, якога чакалі ўвесь год!