24 красавіка ў рамках мерапрыемстваў XX Міжнароднага форуму “ТІБО-2013” і XX Беларускага кангрэса па тэхналогіях інфармацыйнага грамадства адбыўся навукова-практычны семінар “Электронная культура”.
Пад час мерапрыемстваў прагучалі выступленні па праблемах інавацыйнага развіцця ўстаноў культуры, навукі і адукацыі. Удзельнікі семінара дзяліліся вопытам па выкарыстанні інфармацыйна-камунікацыйных тэхналогій у практыцы работы сучасных бібліятэк, музеяў, устаноў адукацыі. Былі асветлены перспектыўныя напрамкі інфарматызацыі ўстаноў культуры, узаемадзеяння з патэнцыяльнымі карыстальнікамі інфармацыйных рэсурсаў, віртуальных і мультымедыйных сэрвісаў і паслуг.
З прывітальным словам выступіў намеснік дырэктара Нацыянальнай бібліятэкі Беларусі па навуковай рабоце і выдавецкай дзейнасці Суша Аляксандр Аляксандравіч і вядучы навуковы супрацоўнік Аб’яднанага інстытута праблем інфарматыкі НАН Беларусі Венгераў Віктар Мікалаевіч.
У якасці дакладчыкаў на семінары выступілі прадстаўнікі Рэспубліканскага цэнтра нацыянальных культур, Нацыянальнай бібліятэкі Беларусі, Цэнтральнай навуковай бібліятэкі імя Я. Коласа НАН Беларусі, Гомельскай абласной універсальнай бібліятэкі імя У.І. Леніна, Рэспубліканскай навукова-тэхнічнай бібліятэкі, Нацыянальнага мастацкага музея Рэспублікі Беларусь, музея “Замкавы комплекс «Мір»”, Нацыянальнага гістарычнага музея Рэспублікі Беларусь, Нацыянальнага гісторыка-культурнага музея-запаведніка “Нясвіж”, СП ЗАТ “Міжнародны дзелавы альянс”, Беларускай дзяржаўнай акадэміі музыкі.
Слухачы і ўдзельнікі дыскусій прадстаўлялі вядучыя ўстановы культуры краіны: Нацыянальны архіў Рэспублікі Беларусь, Дэпартамент па архівах і справаводстве Міністэрства юстыцыі Рэспублікі Беларусь, Магілёўскі абласны метадычны цэнтр народнай творчасці і культурна-асветніцкай работы, ААТ “АГАТ-СІСТЭМ” – упраўляючую кампанію холдынга “Сістэмы сувязі і кіравання”, ТАА НВФ “ІНЕАК”, газету “Культура”, Прэзідэнцкую бібліятэку Рэспублікі Беларусь, абласныя бібліятэкі і многія іншыя ўстановы.
Праграма семінара “Электронная культура”