Згодна з Кодэксам Рэспублікі Беларусь аб культуры Нацыянальная бібліятэка Беларусі (НББ) з’яўляецца “навуковай установай па бібліятэказнаўстве, бібліяграфазнаўстве, кнігазнаўстве”.
З 2013 г. бібліятэка акрэдытавана ў якасці навуковай арганізацыі ў Дзяржаўным камітэце па навуцы і тэхналогіях Рэспублікі Беларусь і Нацыянальнай акадэміі навук Беларусі, і кожныя пяць гадоў яна пацвярджае гэты статус.
Мы рады прэзентаваць новы раздзел партала “Навуковая дзейнасць”, які дэманструе маштабнасць навукова-даследчай, навукова-метадычнай і навукова-арганізацыйнай работы, якая праводзіцца Нацыянальнай бібліятэкай Беларусі.
Раздзел складаецца з пяці рубрык.
У рубрыцы “Навукова-даследчая дзейнасць” прадстаўлена інфармацыя аб даследаваннях у галіне бібліятэказнаўства, кнігазнаўства і бібліяграфіі, праведзеных бібліятэкай з 70-х гг. мінулага стагоддзя. Усяго пералічана больш за 80 навукова-даследчых праектаў, большасць з якіх суправаджаецца кароткім апісаннем. Вынікі некаторых навукова-даследчых работ прадстаўлены ў выглядзе прэзентацый. Тут жа можна даведацца нумар дзяржаўнай рэгістрацыі НДР у Беларускім інстытуце сістэмнага аналізу і інфармацыйнага забеспячэння навукова-тэхнічнай сферы.
Рубрыкі “Навукова-метадычная дзейнасць” і “Навукова-арганізацыйнае забеспячэнне дзейнасці” знаёмяць з той маштабнай працай, якую праводзіць НББ у якасці метадычнага і каардынацыйнага цэнтра для бібліятэк краіны.
У рубрыках “Даклады супрацоўнікаў НББ” і “Публікацыі супрацоўнікаў НББ” прадстаўлены спісы дакладаў і публікацый работнікаў бібліятэкі, пачынаючы з 2006 года.
Прыемнага прагляду!
Матэрыял падрыхтаваны навукова-даследчым аддзелам бібліятэказнаўства.
