14 мая ў Нацыянальнай бібліятэцы Беларусі ў анлайн-рэжыме адбылося пасяджэнне журы па падвядзенні вынікаў XXIX Рэспубліканскага конкурсу “Бібліятэка – асяродак нацыянальнай культуры”.
Конкурс праводзіцца штогод сярод публічных бібліятэк рэспублікі з мэтай павышэння іх ролі ў фарміраванні нацыянальнай самасвядомасці насельніцтва, папулярызацыі нацыянальнай культуры, гісторыі, літаратуры, мовы, народных промыслаў, а таксама падтрымкі і развіцця чытання.
У рэспубліканскім этапе конкурсу ўзялі ўдзел 34 публічныя бібліятэкі: 15 цэнтральных і 19 бібліятэк-філіялаў з усіх абласцей нашай краіны.
Гродзенская вобласць прадставіла на конкурс 8 работ, Гомельская – 7, Магілёўская і Мінская – па 6 работ, Брэсцкая – 4, Віцебская – 3.
У адпаведнасці з умовамі правядзення конкурсу матэрыялы разглядаліся ў чатырох намінацыях: “За значны ўклад у выхаваўчую работу з падрастаючым пакаленнем”, “За пошукавую і даследчую работу”, “За падтрымку і развіццё чытання”, “За навацыі ў галіне бібліятэчнай справы”.
Члены журы адзначылі высокі ўзровень прадстаўленых работ: разнастайнасць увасобленых ідэй, змястоўную насычанасць, крэатыўны падыход да афармлення матэрыялаў.
Па выніках конкурсу будзе выдадзены загад Міністэрства культуры Рэспублікі Беларусь. Пераможцы рэспубліканскага этапу конкурсу будуць узнагароджаны дыпломамі першай, другой, трэцяй ступені і грашовымі прэміямі.
Матэрыял падрыхтаваны навукова-даследчым аддзелам бібліятэказнаўства.
