Набліжаецца 31 снежня, і перадсвяточная гонка набірае абароты. Так цяжка адарвацца ад няўмольна вабнага аліўе, дражнячага паху мандарынаў, шэдэўраў савецкага кінематографа і ўдзяліць час новай кнізе.
Але ж цікавых выданняў, прысвечаных навагоднім імпрэзам, шмат. Давайце спынімся на імгненне і задумаемся 1 студзеня – гэта першая старонка з 365 старонак навагодняй кнігі. Напоўнім кожную з іх новымі ведамі і ўражаннямі і зробім незабыўнай!
Напярэдадні Новага года прадстаўляем кнігі з фонду Нацыянальнай бібліятэкі Беларусі, якія дапамогуць як след падрыхтавацца да гэтага доўгачаканага свята. Вы адкрыеце для сябе новую навуку – “марозазнаўства”, пра якую раскажа першы беларускі Дзед Мароз, прачытаеце дзецям чароўную, але праўдзівую казку пра Дзеда Мароза і Снягурку, даведаецеся, як упрыгожвалі савецкую ёлку, з чаго рабілі першыя цацкі і як святкуюць Нараджэнне Хрыстова ў розных краінах, а таксама вас чакае шмат цікавага пра культуру піцця і абрадавую кулінарыю.
"Дед Мороз и его родня". Вячаслаў Семакоў, Мікалай Бамбіза
Дзе жыве Дзед Мароз? Халасты або жанаты? На чым ездзіць? Інтрыга раскрываецца ў новай кнізе, дзе аўтары прапануюць чытачам вывучыць новую навуку – “марозазнаўства”.
Кнігу напісаў першы беларускі Дзед Мароз – Вячаслаў Семакоў, які ў свой час працаваў навуковым супрацоўнікам і намеснікам генеральнага дырэктара па навукова-даследчай рабоце Нацыянальнага парка “Белавежская пушча”.
Аснова кнігі – гістарычныя факты аб навагодніх традыцыях і матэрыялы з калекцыі Вячаслава Семакова, у якую ў тым ліку ўваходзяць паштоўкі з выявай нашага Дзеда Мароза і яго замежных “калег”. Апавяданне гарманічна дапаўняюць успаміны аўтара пра асабісты вопыт работы на пасадзе галоўнага Дзеда Мароза краіны. У выданні прыведзены спіс гістарычных дат, звязаных са з’яўленнем любімага персанажа і святкаваннем Новага года.
Кніга падыходзіць для сямейнага чытання.
"Правдивая история Деда Мороза". Андрэй Жвалеўскі, Яўгенія Пастэрнак
"…Инженер-путеец Сергей Иванович Морозов, прогуливаясь в Рождество перед Новым 1912 годом со своей женой Машей по Косому переулку в Санкт-Петербурге, попадает под волшебный снег, который, оказывается, выпадает здесь один раз в пятьдесят лет. Сами того еще не ведая, супруги становятся на следующие полстолетия исполнителями новогодних детских мечтаний – Дедом Морозом и Снегурочкой. Они потрясены новыми возможностями и долго считают все творимые ими чудеса случайными совпадениями. Но глаза героям романа открывают птёрки и охли – представители волшебного народца, которые становятся их постоянными помощниками в предновогодние дни и ночи…"
"Правдивая история" адпраўляе чытача ў чароўную казку пра Дзеда Мароза і Снягурку, аднак заснаваную на рэальных гістарычных падзеях, якія адбываліся ў Расіі ў XX стагоддзі. Кожная частка прысвечана асобнаму значнаму перыяду апошняга стагоддзя: рэвалюцыі, Першай сусветнай і Вялікай Айчыннай войнам, падзеям нашага часу.
Кніга абавязкова спадабаецца як дзецям, якія захоўваюць веру ў навагоднія цуды, але ўжо гатовы вывучаць гісторыю і пазнаваць праўду жыцця, так і дарослым.
"История елочной игрушки, или Как наряжали советскую елку". Ала Сальнікава
"Елочные игрушки таинственным образом превращают обычное дерево в волшебную сказку. Однако сказка эта всегда была тесно связана с жизнью, которая прочитывалась в елочной игрушке как в открытой книге".
Як упрыгожвалі савецкія ёлкі? Як і з чаго рабілі ўпрыгажэнні? Як іх выкарыстоўвала ўлада і як да іх ставіліся дзеці і дарослыя? І што ж адбылося з ёлачнымі цацкамі пасля распаду СССР? У сваёй кнізе доктар гістарычных навук Ала Сальнікава даследуе гісторыю савецкіх цацак, надаючы шмат увагі і іх папярэдніцам – цацкам дарэвалюцыйным.
Кніга зацікавіць аматараў і калекцыянераў савецкіх ёлачных цацак.
"Рождество. Праздник всех людей". Карын Ідэн
Кніга прысвечана гісторыі святкавання католікамі Нараджэння Хрыстова і заснавана на гістарычных даных, звестках з Бібліі і народных паданнях. У выданні таксама асвятляюцца перадкалядныя святы і дні, прысвечаныя ўшанаваным многімі народамі святым, распавядаецца пра асаблівасці каляднага посту, прыведзена мноства рэцэптаў, навагодніх прымет і прадказанняў. Яркія прыгожыя ілюстрацыі навеюць святочны настрой любому чытачу.
"Обрядовая кулинария". Алена Высоцкая
Кніга змяшчае не толькі апісанне шмат у чым забытых і зноў адроджаных рэлігійных абрадаў, але і рэцэпты традыцыйных страў. Асобныя раздзелы прысвечаны праваслаўнаму святу Нараджэння Хрыстова, старому Новаму году і нават яўрэйскаму Новаму году – Рош ха-Шанэ.
"Культура питья. Новогодние традиции"
Гэты часопіс раскажа пра асаблівасці культуры піцця беларусаў, растлумачыць, у чым розніца паміж шампанскім і пеністымі вінамі, што такое этнагастранамічныя туры, і дапаможа вызначыцца з падарункам гурману.
Усе вышэйпералічаныя выданні можна заказаць праз электронный каталог Нацыянальнай бібліятэкі Беларусі.
Матэрыял падрыхтаваны аддзелам суправаджэння інтэрнэт-партала.