У Год малой радзімы і да 75-годдзя Вялікай Перамогі віртуальная чытальная зала працягвае серыю навін пра краязнаўчыя электронныя рэсурсы.
Паўнатэкставая карпаратыўная база даных “Жывая памяць пакаленняў” – своеасаблівы інфармацыйны мемарыял тым, хто здабываў Вялікую Перамогу. Рэсурс створаны бібліятэкарамі Магілёўшчыны да 75-годдзя вызвалення Беларусі і Магілёўскай вобласці ад нямецка-фашысцкіх захопнікаў.
База даных уключае сабраныя па крупінках успаміны і іншыя дакументальныя крыніцы аб Вялікай Айчыннай вайне ўраджэнцаў і жыхароў Магілёўскай вобласці – удзельнікаў і сведкаў ваенных падзей.
Пяць раздзелаў – як пяць ракурсаў адлюстравання тэмы. У першым з іх – “Я памятаю” – вайна паўстае праз успаміны, а таксама біяграфіі, фотаматэрыялы, копіі дакументаў, артыкулы са зборнікаў і перыядычных выданняў. Раздзелы “Галасы вайны”, “Асобы Перамогі” і “Палявая пошта” ўтрымліваюць аўдыязапісы, відэасюжэты і ўнікальную калекцыю франтавых лістоў. Яны даюць магчымасць адчуць падзеі ваенных гадоў праз лёс асобнага чалавека – франтавіка, партызана, вязня, падпольшчыка, працаўніка тылу, відавочцы вайны, у тым ліку дзіцяці. У раздзеле “Нашчадкі пра вайну” сабраны дзіцячыя вершы, апавяданні, малюнкі і сачыненні, якія сведчаць пра стаўленне да вайны сучаснага падрастаючага пакалення.
Інфармацыя прадастаўлена на беларускай і рускай мовах.
Перайсці да базы даных можна з віртуальнай чытальнай залы і з раздзела “Рэсурсы бібліятэк” вэб-навігатара “Беларусь у інфармацыйнай прасторы”.
Матэрыял прадастаўлены аддзелам карпаратыўнага ўзаемадзеяння.
