Нацыянальная бібліятэка Беларусі стала ўдзельніцай праекта “Стварай культуру: бібліятэчныя інавацыйныя паслугі”, які ініцыявала УГА “Украінская бібліятэчная асацыяцыя”.
Партнёры праекта – арганізацыя "Публічныя бібліятэкі г. Орхуса" (Данія) і Беларуская бібліятэчная асацыяцыя. Праект рэалізуецца дзякуючы падтрымцы Еўрапейскага саюза (праграма House of Europe).
Асноўная мэта праекта, які будзе доўжыцца з сакавіка па снежань 2020 года, – навучыць бібліятэкараў Украіны і Беларусі ствараць інавацыйныя бібліятэчныя паслугі, развіваць культурныя і творчыя індустрыі гэтых краін з выкарыстаннем спецыяльнай метадалогіі “Дызайн-мысленне для бібліятэк”. Гэтая метадалогія была распрацавана публічнымі бібліятэкамі Орхуса і Чыкага.
Прадстаўнікі 32 бібліятэк Украіны і Беларусі пройдуць навучанне на міжнародных трэнінгах.
Беларускімі ўдзельнікамі праекта з’яўляюцца:
- Нацыянальная бібліятэка Беларусі
- Брэсцкая абласная бібліятэка імя М. Горкага
- Магілёўская абласная бібліятэка імя У.І. Леніна
- Барысаўская цэнтральная раённая бібліятэка імя І.Х. Каладзеева
- Цэнтральная раённая бібліятэка імя М. Багдановіча г. Маладзечна
- Цэнтральная гарадская бібліятэка імя В.П. Таўлая г. Баранавічы
Матэрыял прадастаўлены навукова-даследчым аддзелам кнігазнаўства.