6–10 лютага Нацыянальная бібліятэка Беларусі традыцыйна брала ўдзел у XX Мінскай міжнароднай кніжнай выстаўцы-кірмашы, якая праходзіла ў Нацыянальным выставачным цэнтры “БелЭкспа”.
Кніжная выстаўка ў Мінску з кожным годам карыстаецца ўсё большым аўтарытэтам, што пацвярджае пастаянны рост колькасці краін-удзельніц і наведвальнікаў. Сёлета свае стэнды прадставілі звыш 600 экспанентаў з 25 краін свету. Юбілейная кніжная выстаўка-кірмаш стала сімвалічным вынікам праведзенага ў Беларусі летась Года кнігі.
Ганаровым госцем XX Мінскай міжнароднай кніжнай выстаўкі-кірмашу стала Расія, якая прадставіла беларускай грамадскасці выданні рознай тэматычнай скіраванасці.
На экспазіцыйна-выставачным стэндзе Нацыянальнай бібліятэкі Беларусі былі прадстаўлены друкаваныя і электронныя дакументы, падрыхтаваныя і выдадзеныя бібліятэкай за апошнія гады. Таксама наведвальнікам былі прадстаўлены ўнікальныя факсімільныя выданні і рэдкія кнігі з фонду бібліятэкі.
6 лютага ў рамках XХ Мінскай міжнароднай кніжнай выстаўкі-кірмашу адбылася прэзентацыя факсімільнага выдання Полацкага Евангелля, найкаштоўнейшага кніжнага помніка нашай краіны.
7 лютага на Нацыянальным стэндзе Беларусі адбылася прэзентацыя ўнікальных факсімільных выданняў Нацыянальнай бібліятэкі, дзе былі прадстаўлены выданні 2012 г., за якія калектыву бібліятэкі прысуджана спецыяльная прэмія Прэзідэнта Рэспублікі Беларусь дзеячам культуры і мастацтва, а таксама ўзнагарода ў спецыяльнай намінацыі “За ўклад у захаванне духоўнай спадчыны” пад час правядзення Нацыянальнага конкурсу “Мастацтва кнігі – 2013”.
8 лютага ў зале адукацыйных тэхналогій Нацыянальнай бібліятэкі Беларусі прайшло пасяджэнне круглага стала “Бібліятэкі Беларусі і фарміраванне інфармацыйнай культуры навучэнцаў і студэнтаў”.
Таксама 8 лютага на Нацыянальным стэндзе Беларусі адбылася прэзентацыя сумесных навукова-выдавецкіх праектаў Нацыянальнай бібліятэкі Беларусі і Белінвестбанка. Гэта тры камплекты календароў пад агульнай назвай “Памятаем пра мінулае, рухаючыся ў будучыню”.
За актыўны ўдзел і цікавую экспазіцыю Нацыянальная бібліятэка Беларусі ўзнагароджана дыпломам ХХ Мінскай міжнароднай кніжнай выстаўкі-кірмашу.
Праграма мерапрыемстваў ХХ Мінскай міжнароднай кніжнай выстаўкі-кірмашу