17 лістапада ў галерэі "Ракурс" Нацыянальнай бібліятэкі Беларусі ладзілася прэзентацыя кнігі "Народныя казкi для дзетак".
Мерапрыемства арганізавана Дзіцячым фондам ААН (ЮНІСЕФ) сумесна з Нацыянальнай бібліятэкай Беларусі ў рамках фестывальнага тыдня дзіцячага конкурсу песні "Еўрабачанне-2010" і напярэдадні дня падпісання Канвенцыі ААН аб правах дзіцяці.
У кнізе сабраны 19 беларускіх казак для дзяцей як у аўдыя-, так і друкаваным варыянце, эксклюзіўныя ілюстрацыі да іх, каментарыі псіхолага, навучальныя гульні і ўнікальная ілюстраваная Канвенцыя аб правах дзіцяці на беларускай мове.
Старадаўнія беларускія казкі, знойдзеныя ў розных рэгіёнах Беларусі вядомым музыкантам Алегам Хаменкам, з’яўляюцца ўнікальным зборам народнай спадчыны – беларускага фальклору. Казкі былі бясплатна перададзены ЮНІСЕФ. Вынікам сумеснай працы стаў праект "Народныя казкi для дзетак", ажыццёўлены ў рамках праграмы ЮНІСЕФ "Развіццё дзяцей ранняга ўзросту".
У рамках прэзентацыі адбылася ўрачыстая перадача кнігі тыражом у 2 500 экзэмпляраў Нацыянальнай бібліятэцы Беларусі і ўсім дзіцячым бібліятэкам Рэспублікі Беларусь.
У мерапрыемстве ўзялі ўдзел прадстаўнік Дзіцячага фонду ААН (ЮНІСЕФ) у Рэспубліцы Беларусь Юрый Аксамітны, дырэктар Нацыянальнай бібліятэкі Беларусі Раман Матульскі, пасол добрай волі ЮНІСЕФ, зорка сусветнай опернай сцэны Марыя Гулегіна, музыкант і лідар групы "Палац" Алег Хаменка.
У рамках мерапрыемства адкрылася выстава ілюстрацый да кнігі "Народныя казкi для дзетак", выкананых мастаком Юліяй Рудзіцкай. З 20 лістапада экспазіцыя будзе размешчаная ў мабільнай галерэі Нацыянальнай бібліятэкі Беларусі.