7 кастрычніка ў Нацыянальнай бібліятэцы адбылася прэзентацыя кнігі Францішка Жылкі “Млынарства ў Беларусі: гісторыя і сучаснасць” (2021).
Кніга Францішка Баляслававіча выйшла ў 2021 годзе ў выдавецтве “Энциклопедикс”. Аўтар склаў фотатэку са здымкаў пачатку XXI ст., на якіх зафіксавана багацце разнастайнай архітэктуры вадзяных млыноў Беларусі, іх гарманічнае спалучэнне з навакольным асяроддзем. У кнізе змешчана каля 500 даўніх і сучасных фатаграфій, апісаны цікавыя тэхнічныя і гістарычныя дэталі, а таксама выкарыстаны ўспаміны нашчадкаў беларускіх млынароў.
На мерапрыемстве з прывітальным словам да прысутных звярнулася генеральны дырэктар Нацыянальнай бібліятэкі Беларусі Аксана Кніжнікава. У ліку шаноўных гасцей з экспертным меркаваннем выступілі старшыня Беларускага фонду культуры Тадэвуш Стружэцкі, старшыня Беларускага геаграфічнага таварыства, дацэнт, кандыдат геаграфічных навук Аляксей Яротаў. Дырэктар выдавецтва “Энциклопедикс” Ігар Чэкалаў, а таксама сам аўтар выдання Францішак Жылка падрабязна распавялі аб гісторыі стварэння кнігі і падзякавалі за сумесную працу ўдзельнікам праекта і перадалі экзэмпляр “Млынарства ў Беларусі: гісторыя і сучаснасць” (2021) у фонд Нацыяльнай бібліятэкі Беларусі.
Новае выданне дазваляе ўсім зацікаўленым айчыннай гісторыяй і краязнаўствам глыбей пазнаёміцца з мінулым беларускага млынарства і атрымаць дадатковую інфармацыю аб гэтым промысле.
Да прэзентацыі кнігі Нацыянальная бібліятэка Беларусі спецыяльна падрыхтавала выстаўку-прагляд твораў Францішка Жылкі і выданняў, прысвечаных млынарству на Беларусі.
Матэрыял пададзены аддзелам сувязей з грамадскасцю.
