19 лютага на базе Нацыянальнай бібліятэкі Беларусі адбылася прэзентацыя “Новыя тэхналогіі і нестандартныя рашэнні ў стварэнні электронных архіваў”.
У прэзентацыі прынялі ўдзел прадстаўнікі фінскай фірмы “Planix” (генеральны дырэктар кампаніі спадар Хары Лайцінен, кіраўнік справамі ў Беларусі Вікторыя Губанава), супрацоўнікі Нацыянальнай бібліятэкі Беларусі, прадстаўнікі навуковых і публічных бібліятэк рэспублікі.
Кампанія “Planix” на працягу 20 гадоў супрацоўнічае з найбуйнейшымі дзяржаўнымі і прыватнымі арганізацыямі Фінляндыі ў рамках стварэння электронных архіваў, а таксама з’яўляецца афіцыйным пастаўшчыком прадукцыі сусветных брэндаў у галіне прафесійнага абсталявання для сканіравання.
У ходзе прэзентацый былі прадстаўлены тэхналогіі электроннага архівіравання ў Нацыянальным архіве, Нацыянальным музеі і іншых муніцыпальных службах Фінляндыі.
Прадстаўнікі кампаніі “Planix” прадэманстравалі ўдзельнікам працэс алічбоўкі на шырокафарматных сканерах “Contex”, расказалі пра багатыя магчымасці гэтага абсталявання пры рабоце са зношанымі дакументамі. Прадстаўнікоў бібліятэчнай супольнасці асабліва зацікавіла інфармацыя пра кніжныя сканеры: “Book2net Spirit” – адзін з самых хуткіх у свеце каляровы кніжны сканер фармату А3+, і “Book2net V-Scan Cobra 110°”, здольны хутка алічбоўваць кнігі, газеты і часопісы фармату А1.
Пасля мерапрыемства госці з Фінляндыі пазнаёміліся з вопытам Нацыянальнай бібліятэкі Беларусі па алічбоўцы сваіх фондаў.