28 чэрвеня ў бібліятэцы прайшла прэзентацыя кніг для дзяцей “В гостях у Франциска Скорины” і “Большое представление для Сонечки”.
Аўтар кніжнага праекта “Книга волшебства” – пісьменніца Алена Стэльмах. Ева НЭММ – гэта творчы псеўданім, ў аснову якога ўваходзяць першыя літары імён суаўтараў Алены, яе дачок і ўнучак – Алены, Вікторыі, Надзеі, Эміліі, Марыі, Маргарыты. І таты Андрэя, можна сказаць, асабістага кіроўцы пісьменніц.
Асновай для стварэння невялікай кніжнай серыі стаў надзвычайны інтарэс дзяцей да гісторыі роднай краіны. Так, героі першай кнігі “В гостях у Франциска Скорины” чароўным чынам пераносяцца ў майстэрню першадрукара, дзе разам з ім спасцігаюць сакрэты стварэння цуду пад назвай “кніга”. У другой кнізе “Большое представление для Сонечки” галоўныя персанажы працягваюць падарожжа ў часе і трапляюць у Белавежскую пушчу, дзе іх чакаюць захапляльныя прыгоды і знаёмства з вядомай Барбарай Радзівіл.
Аўтар кніжнага праекта, член Саюза пісьменнікаў Беларусі, заслужаны журналіст Беларускага саюза журналістаў Алена Стэльмах перадала падарункавыя экзэмпляры кніг Алене Далгаполавай, першаму намесніку дырэктара Нацыянальнай бібліятэкі Беларусі.
З моманту выхаду першай кнігі праект паспеў набыць міжнароднае гучанне – прэзентацыі выдання ўжо прайшлі ў Калмыкіі, Дагестане, Малдове і іншых краінах. Творчыя сустрэчы адбыліся ў рамках святкавання 500-годдзя беларускага кнігадрукавання і дазволілі маленькім чытачам з іншых краін пазнаёміцца з гісторыяй і культурай Беларусі.
Вывучаць гісторыю роднай краіны цікава і захапляльна, калі рабіць гэта па вясёлых “падручніках” Евы НЭММ!